In quodam tractu, qui estimatur S[=ci] Hilarii fuisse, sic inuenimus scriptum, sicut Anglice hic interpretauimus, et ad testimonium ipsam Latinitatem posuimus: "Demones credunt et contremescunt; qui autem non credit, et non contremescit demonibus deterior est: qui autem credit, et contremescit, et ueritatem operibus non agit demonibus similis est." Se ðe rihtlice gelyfð, and rihtlice his lif leofað, and mid Godes ege gód weorc begæð oð ende his lifes, se bið gehealden, and he hæfð ece líf mid Gode, and mid eallum his halgum. Drihten cwæð, þa ðe gelyfað, him fyligað þas tacnu, "On minum naman hí adræfað deoflu; hí sprecað mid niwum gereordum; hí afyrsiað næddran; and ðeah ðe hí unlybban drincan, hit him ne derað; hí settað heora handa ofer adlige men, and him bið tela." Þas wundra wæron nyd-behefe on anginne cristendomes, forðan ðurh ða tacna wearð þæt hæðene folc gebiged to geleafan. Se man ðe plantað treowa oððe wyrta, swa lange he hí wæterað oðþæt hí beoð ciðfæste; syððan hí growende beoð he geswycð þære wæterunge: swa eac se Ælmihtiga God, swa lange he æteowde his wundra ðam hæðenum folce, oðþæt hí geleaffulle wæron: syððan se geleafa sprang geond ealne middangeard, siððan geswicon ða wundra. Ac ðeah-hwæðere Godes gelaðung wyrcð gyt dæghwamlice þa ylcan wundra gastlice þe ða apostoli ða worhton lichamlice. Þonne se preost cristnað þæt cild, þonne adræfð he ðone deofol of ðam cilde; forðan ðe ælc hæðen man bið deofles, ac þurh {306} þæt halige fulluht he bið Godes, gif he hit gehylt. Se ðe forlæt bysmorlice spellunga, and talu, and derigendlice gaffetunga, and gebysegað his muð mid Godes herungum and gebedum, he sprecð þonne mid niwum gereordum. Se ðe ungeradum oððe ungeðyldigum styrð, and þa biternysse his heortan gestilð, he afyrsað þa næddran, forðan ðe he adwæscð þa yfelnyssa his modes. Se ðe bið forspanen to forligre, and ðeah-hwæðere ne bið gebiged to ðære fremminge, he drincð unlybban, ac hit him ne derað, gif he mid gebédum to Gode flihð. Gif hwa bið geuntrumod on his anginne, and asolcen fram godre drohtnunge, gif hine hwa ðonne mid tihtinge and gebisnungum godra weorca getrymð and arærð, þonne bið hit swilce he sette his handa ofer untrumne and hine gehæle.