Þa gastlican wundra sind maran þonne þa lichamlican wæron, forðan ðe ðas wundra gehælað þæs mannes sawle, ðe is ece, and ða ærran tacna gehældon þone deadlican lichaman. Þa ærran wundra worhton ægðer ge góde men ge yfele. Yfel wæs Iudas, ðe Crist belæwde, þeah he worhte wundra æror ðurh Godes naman. Be swylcum mannum cwæð Crist on oðre stowe, "Ic secge eow, manega cweðað to me on ðam micclan dæge, Drihten, Drihten, la hú ne witegode we on ðinum naman, and we adræfdon deoflo of wodum mannum, and we micele mihta on þinum naman gefremedon? Þonne andette ic him, Ne can ic eow: gewitað fram me, ge unrihtwise wyrhtan." Mine gebroðru, ne lufige ge ða wundra þe magon beon gemæne godum and yfelum, ac lufiað þa tacna þe sind sinderlice godra manna, þæt synd soðre lufe and arfæstnysse tacna. Næfð se yfela ða soðan lufe, ne se góda nys hyre bedæled. Þas tacna sind digle and unpleolice, and hí habbað swa miccle maran edlean æt Gode, swa micclum swa heora wuldor is læsse mid mannum. Se Wealdenda Drihten, æfter ðisum wordum, wæs genumen to heofonum, and sitt on ða swiðran hand his Fæder. We rædað on ðære ealdan ǽ, þæt twegen Godes men, {308} Enoh and Helias, wæron ahafene to heofonum butan deaðe: ac hí elciað ongean ðone deað, and mid ealle ne forfleoð. Hí sind genumene to lyftenre heofenan na to rodorlicere, and drohtniað on sumum diglan earde mid micelre strencðe lichaman and sawle, oðþæt hi eft ongean cyrron, on ende þisre worulde, togeanes Antecriste, and deaðes onfoð. Ure Ælmihtiga Alysend ne elcode na ongean þone deað, ac he hine oferswiðde mid his æriste, and geswutulode his wuldor þurh his upstige to ðam yfemystan þrymsetle. We rædað be ðam witegan Heliam, þæt englas hine feredon on heofonlicum cræte, forðan ðe seo untrumnys his gecyndes behofode sumes byrðres. Ure Alysend Crist næs geferod mid cræte ne ðurh engla fultum; forðan se ðe ealle ðing geworhte, he wæs geferod mid his agenre mihte ofer ealle gesceafta. Se ærra man Enoh wæs geferod to lyftenre heofonan, and Helias wæs mid cræte up-awegen; ac se Ælmihtiga Hælend næs gefered ne awegen, ac he ðurhferde ða roderlican heofonan þurh his agene mihte. Us is to smeagenne hu seo clænnys wæs ðeonde geond þa geferedan ðenas, and þurh ðone astigendan Hælend. Enoh wæs geferod, seðe wæs mid hæmede gestryned, and mid hæmede wæs strynende. Helias wæs on cræte geferod, seðe wæs þurh hæmed gestryned, ac he ne strynde þurh hæmed, forðan ðe he wunade on his life butan wife. Se Hælend astah to heofonum, seðe næs mid hæmede gestryned, ne he sylf strynende næs; forðan ðe he is ord and anginn ealra clænnyssa, and him is seo clænnys swiðe lufigendlic mægen, þæt he geswutulode ðaða he geceas him mæden-mann to meder. And eall se halga heap ðe him fyligde wæs on clænnysse wunigende, swa swa he cwæð sumum godspelle, "Se ðe to me cymð, ne mæg he beon min leorning-cniht, buton he his wif hatige."