"Ða wearð seo menigu swiðe ablicged, and mid wundrunge cwædon, La hú, ne sind þas ðe her sprecað Galileisce? And ure ælc gehyrde hu hi spræcon urum gereordum, on ðam ðe we acennede wæron! We gehyrdon hí sprecan Godes mærða mid urum gereordum. La hwæt ðis beon sceole? Þa cwædon ða Iudeiscan mid hospe, Þas men sindon mid muste fordrencte. Þa andwyrde Petrus, Hit is undern-tíd; hu mihte we on ðysre tide beon fordrencte? Ac ðæs witegan cwyde Ioheles is nu gefylled. God cwæð þurh ðæs witegan muð, þæt he wolde his Gast asendan ofer mennisc flæsc; and manna bearn sceolon witigian, and ic sylle mine forebeacn ufan of heofonum, and mine tácna niðer on eorðan. Wite ge soðlice þæt Crist arás of deaðe, and on ure gewitnysse astah to heofonum, and sitt æt his Fæder swiðran, swa swa Dauid be him witegode, þus cweðende, Drihten cwæð to minum Drihtne, Site to minre swiðran, oðþæt ic alecge ðine fynd under þinum fot-scamele. Þa þæt folc ðis gehyrde, ða wurdon hí onbryrde, and cwædon to ðam apostolon, La leof, hwæt is us to donne? Þa andwyrde Petrus, Behreowsiað eowre synna, and underfoð fulluht on Cristes naman, and eowre synna beoð {316} adylegode, and ge underfoð þone Halgan Gast. Þa underfengon hi his lare, and bugon to fulluhte on ðam dæge ðreo ðusend manna. Þa wæron ealle on annysse mid þam apostolum, and beceapodon heora æhta, and þæt feoh betæhton ðam apostolum, and hi dældon ælcum be his neode." "Eft on oðre bodunge gelyfdon fif ðusend wera on Crist, and wearð eall seo geleaffulle menigu swa anmod swilce hí ealle hæfdon ane heortan and ane sawle; ne heora nan næfde synderlice æhta, ac him eallum wæs gemæne heora ðing, ne ðær næs nán wædla betwux him. Þa ðe land-are hæfdon hi hit beceapodon, and þæt wurð brohton to ðæra apostola fotum: hí ða dældon ælcum be his neode." "Þa worhte God fela tacna on ðam folce ðurh ðæra apostola handa, swa þæt hi gelogodon ða untruman be ðære stræt þær Petrus forð eode, and swa hraðe swa his sceadu hi hreopode, hi wurdon gehælede fram eallum untrumnyssum. Þa arn micel menigu to of gehendum burgum, and brohton heora untruman and ða deofol-seocan, and hí ealle wurdon gehælede æt ðæra apostola handum. Hi setton heora handa ofer gelyfede men, and hí underfengon þone Halgan Gast."