"Þa wæs sum ðegen, Annanias geháten, and his wíf Saphíra: hí cwædon him betweonan, þæt hí woldon bugan to ðæra apostola geferrædene. Namon ða to ræde, þæt him wærlicor wære, þæt hí sumne dæl heora landes wurðes æthæfdon, weald him getimode. Com ða se ðegen mid feo to ðam apostolum. Þa cwæð Petrus, Annania, deofol bepæhte ðine heortan, and ðu hæfst alogen þam Halgan Gaste. Hwí woldest ðu swician on ðinum agenum? Ne luge ðu na mannum, ac Gode. Þa hé þas word gehyrde, þa feol hé adúne and gewát. Þaða he bebyrged wæs, þa com his wif Saphíra, and nyste hu hire were gelumpen wæs. Ða cwæð Petrus, Sege me, beceapode ge ðus micel landes? Heo andwyrde, Gea, leof, swa micel. Eft ða cwæð Petrus, Hwí gewearð inc swa, þæt gyt dorston fandian Godes? Heo feoll ðærrihte and gewát, and hí man {318} bebyrigde to hyre were. Þa wearð micel ege on Godes gelaðunge and on eallum þe þæt geaxodon." Þa apostoli siððan, ærðam ðe hi toferdon, gesetton Iacobum, þe wæs geháten Rihtwís, on Cristes setle, and eal seo geleaffulle gelaðung him gehyrsumode, æfter Godes tæcunge. He ða gesæt þæt setl ðritig geara, and æfter him Symeon, þæs Hælendes mæg. Æfter ðære gebysnunge wurdon arærede munec-líf mid þære gehealdsumnysse, þæt hi drohtnian on mynstre, be heora ealdres dihte, on clænnesse, and him beon heora æhta eallum gemæne, swa ða apostoli hit astealdon. Ge gehyrdon lytle ǽr, on ðisre rædinge, þæt se Halga Gast com ofer ða apostolas on fyrenum tungum, and him forgeaf ingehyd ealra gereorda; forðan ðe se eadmoda heap geearnode æt Gode þæt iú ǽr þæt modige werod forleas. Hit getimode æfter Noes flode, þæt entas woldon aræran ane burh, and ænne stypel swa heahne, þæt his hrof astige oð heofon. Þa wæs an gereord on eallum mancynne, and þæt weorc wæs begunnen ongean Godes willan. God eac forði hí tostencte, swa þæt he forgeaf ælcum ðæra wyrhtena seltcuð gereord, and heora nán ne cuðe oðres spræce tocnawan. Hí ða geswicon ðære getimbrunge, and toferdon geond ealne middangeard; and wæron siððan swa fela gereord swa ðæra wyrhtena wæs. Nu eft on ðisum dæge, þurh ðæs Halgan Gastes to-cyme, wurdon ealle gereord ge-anlæhte and geðwære; forðan ðe eal se halga heap Cristes hyredes wæs sprecende mid eallum gereordum; and eac þæt wunderlicor wæs, ðaða heora án bodade mid anre spræce, ælcum wæs geðuht, ðe ða bodunge gehyrde, swilce he spræce mid his gereorde, wæron hí Ebreisce, oððe Grecisce, oððe Romanisce, oððe Egyptisce, oððe swa hwilcere ðeode swa hí wæron þe ða lare gehyrdon. On ðysre geferrædene geearnode heora eadmodnys þas mihte, and ðæra enta modignys geearnode gescyndnysse.