Þa gelamp hit þæt se wædla gewát, and englas ferodon his sawle to ðæs heahfæderes wununge Abrahámes; and ðæs rican gast æfter forðsiðe wearð on helle besenct; and he ða ðone wolde habban him to mundboran, þam ðe he nolde ǽr his cruman syllan. He bæd þa Abraham mid earmlicre stemne þæt Lazarus moste his tungan drypan; ac him næs getiðod ðære lytlan lisse, forðan ðe Lazarus ne moste ǽr on life hedan ðæra crumena his mysan. His tungan he mænde swiðost, forðan ðe hit is gewunelic þæt ða welegan on heora gebeorscipe begað derigendlice gafetunge; þa wæs seo tunge, ðurh rihtwisnysse edlean, teartlicor gewítnod for his {332} gegafspræce. Se heahfæder Abraham him cwæð to, "Ðu, mín bearn, beo ðe gemyndig þæt ðu underfenge welan on ðinum life, and Lazarus yrmðe." Þes cwyde is swiðor to ondrædenne þonne to trahtnigenne. Ðam rican wæs forgolden mid ðam hwilwendlicum spedum, gif he hwæt to gode gefremode; and ðam ðearfan wæs forgolden mid ðære yrmðe, gif he hwæt to yfle gefremode. Þa underfeng se welega his gesælðe to edleane to sceortum brice, and þæs ðearfan hafenleast aclænsode his lytlan gyltas. Hine geswencte seo wædlung, and afeormode; þone oðerne gewelgode his genihtsumnys, and bepæhte. Ic bidde eow, men ða leofostan, ne forseo ge Godes ðearfan, ðeah ðe hi tallice hwæt gefremman; forðan ðe heora yrmð afeormað þæt þæt seo gehwæde oferflowendnys gewemð. Háwiað be gehwilcum, forðan ðe oft getimað yfelum teala for life. Se heahfæder cwæð to ðam welegan, "Betwux us and eow is gefæstnod micel ðrosm; þeah hwa wille fram ús to eow, he ne mæg; ne eac fram eow to ús." Mid micelre geornfulnysse gewilniað þa wiðercoran þæt hi moton of ðære susle ðe hi on cwylmiað, ac seo fæstnung ðære hellican clysinge ne geðafað þæt hi æfre ut-abrecon. Eac ða halgan beoð mid heora Scyppendes rihtwisnysse swa afyllede, þæt hi nateshwon ne besargiað ðæra wiðercorenra yrmðe; forðan ðe hi geseoð þa fordónan swa micclum fram him geælfremode, swa micclum swa hi beoð fram heora leofan Drihtne ascofene. Siððan se rica wearð orwene his agenre alysednysse, ða beárn him on mod his gebroðra gemynd; forðan ðe ðæra wiðercorenra wite tiht for wel oft heora mod unnytwurðlice to lufe, swilce hi þonne lufian heora siblingas, ðe ǽr on life ne hi sylfe ne heora magas ne lufedon. Ne lufað se hine sylfne seðe hine mid synnum bebint. He oncneow Lazarum, ðone ðe he ǽr forseah, and he gemunde his gebroðra, ða ðe he bæftan forlet; forðan ðe se ðearfa nære fullice gewrecen on ðam rican, gif he on his wite hine ne oncneowe; and eft {334} nære his wite fulfremed on ðam fyre, buton he ða ylcan pinunga his siblingum gewende.