Angeli sind gecwedene Godes bodan; archangeli, healice bodan; uirtutes, mihta, ðurh ða wyrcð God fela wundra. Potestates sind ánwealdu, ðe habbað anweald ofer ða awyrgedan gastas, þæt hi ne magon geleaffulra manna heortan swa micclum costnian swa hi willað. Principatus sind ealdorscipas, ðe ðæra godra engla gymað, and hi be heora dihte ða godcundlican gerynu gefyllað. Dominationes sind hlafordscypas gecwedene, forðan ðe him gehyrsumiað oðra engla werod mid micelre underðeodnysse. Throni sind þrymsetl, þa beoð gefyllede mid swa micelre gife ðære Ælmihtigan {344} Godcundnysse, þæt se Eallwealdenda God on him wunað, and ðurh hi his domas tosceat. Cherubin is gecweden gefyllednys ingehydes, oððe gewittes: hi sind afyllede mid gewitte swa miccle swiðor, swa hi gehendran beoð heora Scyppende, ðurh wurðscipe heora geearnunga. Seraphim sind gecwedene byrnende, oððe, onælende: hi sind swa miccle swiðor byrnende on Godes lufe, swa micclum swa hi sind to him geðeodde; forðan ðe nane oðre englas ne sind betweonan him and ðam Ælmihtigan Gode. Hi sind byrnende na on fyres wisan, ac mid micelre lufe þæs Wealdendan Cyninges. Godes rice bið gelogod mid engla weredum and geðungenum mannum, and we gelyfað þæt of mancynne swa micel getel astige þæt uplice rice, swa micel swa on heofonum beláf haligra gasta æfter ðam hryre ðæra awyrgedra gasta. Nigon engla werod þær wæron to lafe, and þæt teoðe forferde. Nu bið eft seo micelnys geðungenra manna swa micel swa ðæra staðelfæstra engla wæs; and we beoð geendebyrde to heora weredum, æfter urum geearnungum. Menige geleaffulle men sind þe habbað lytel andgit to understandenne ða deopnysse Godes lare, and willað þeah-hwæðere oðrum mannum mid arfæstnysse cyðan ymbe Godes mærða, be heora andgites mæðe: þas beoð geendebyrde to englum, þæt is, to Godes bydelum. Þa gecorenan ðe magon asmeagan Godes digelnysse, and oðrum bodian mid gastlicre lare, hi beoð getealde to heah-englum, þæt is to healicum bodum. Þa halgan, ðe on life wundra wyrceað, beoð geendebyrde betwux ðam heofenlicum mihtum þe Godes tacna gefremmað. Sind eac sume gecorene menn ðe aflyað þa awyrgedan gastas fram ofsettum mannum, ðurh mihte heora bena: hwærto beoð þas geendebyrde buton to ðam heofenlicum anwealdum, be gewyldað þa feondlican costneras? Þa gecorenan ðe ðurh healice geearnunga þa læssan gebroðru oferstigað mid ealdorscipe, þa habbað eac heora dæl betwux ðam heofenlicum ealderdomum. Sume beoð swa geðungene þæt hí wealdað mid heora hlafordscipe ealle uncysta and leahtras on him sylfum, swa þæt hi {346} beoð godas getealde ðurh ða healican clænnysse: be ðam cwæð se Ælmihtiga to Moysen, "Ic ðe gesette, þæt þu wære Pharaones god." Þas Godes ðegnas, þe beoð on swa micelre geðincðe on gesihðe þæs Ælmihtigan þæt hi sind godas getealde, hwider gescyt ðonne heora endebyrdnysse, buton to ðam werode ðe sind hlafordscipas gecwedene? forðan ðe him oðre englas underðeodde beoð.