Þa Nero þæt geseah, ða wende hé þæt he Godes Sunu wære. Petrus cwæð þæt hé Godes wiðersaca wære, and mid leasum drýcræfte forscyldigod, and cwæð þæt he wære gewiss deofol on menniscre edwiste. Simon cwæð, "Nis na gedafenlic þæt ðu, cyning, hlyste anes leases fisceres wordum; ac ic ðisne hosp leng ne forbere: nu ic beode minum englum þæt hí me on ðisum fiscere gewrecon." Petrus cwæð, "Ne ondræde ic ðine awyrgedan gastas, ac hí weorðað afyrhte þurh mines Drihtnes geleafan." Nero cwæð, "Ne ondrætst ðu ðe, Petrus, Simones mihta, ðe mid wundrum his godcundnysse geswutelað?" Petrus cwæð, "Gif he godcundnysse hæbbe, ðonne secge he hwæt ic ðence, oððe hwæt ic dón wylle." Nero cwæð, "Sege me, Petrus, on sundor-spræce hwæt ðu ðence." He ða leat to ðæs caseres eare, and het him beran diglice berenne hláf; and he bletsode ðone hláf, and tobræc, and bewand on his twam slyfum, ðus cweðende, "Sege nu, Simon, hwæt ic ðohte, oððe cwæde, oþþe gedyde." He ða gebealh hine, forðan þe he ne mihte geopenian Petres digelnysse, and dyde þa mid drýcræfte þæt ðær comon micele hundas, and ræsdon wið Petres weard; ac Petrus æteowde ðone gebletsodan hláf ðam hundum, and hí ðærrihte of heora {378} gesihðe fordwinon. He ða cwæð to ðam casere, "Simon me mid his englum geðiwde, nu sende he hundas to me; forðan ðe he næfð godcundlice englas, ac hæfð hundlice." Nero cwæð, "Hwæt is nu, Simon? Ic wene wit sind oferswiðde." Simon andwyrde, "Þu goda cyning, nat nán man manna geðohtas buton Gode anum." Petrus andwyrde, "Untwylice þu lihst þæt þu God sy, nu ðu nast manna geðohtas."