"Wæs ða sum Godes ðegen binnan ðære byrig, his nama wæs Annanías, to ðam spræc Drihten ðysum wordum, Annanía, arís, and gecum to minum ðeowan Saulum, se is biddende minre miltsunge mid eornestum mode. He andwyrde ðære drihtenlican stemne, Min Hælend, hu mæg ic hine gesprecan, seðe is ehtere ðinra halgena, ðurh mihte ðæra ealdor-biscopa? Drihten cwæð, Far swa ic ðe sæde, forðan ðe hé is me gecoren fætels, þæt hé tobere minne naman ðeodum, and cynegum, and Israhela bearnum; and he sceal fela ðrowian for minum naman. Annanías ða becom to ðam gecorenan cempan, and sette his handa him on-uppan mid þisre gretinge, Saule, min broðor, se Hælend, þe ðe be wege gespræc, sende me wið ðín, þæt þu geseo, and mid þam Halgan Gaste gefylled sy. Þa, mid ðisum wordum, feollon swylce fylmena of his eagum, and he ðærrihte gesihðe underfeng, and to fulluhte beah. Wunode ða sume feawa daga mid þam Godes ðeowum binnan ðære byrig, and mid micelre bylde þam Iudeiscum bodade, þæt Crist, ðe hí wiðsocon, is ðæs Ælmihtigan Godes Sunu. Hí wurdon swiðlice {388} ablicgede, and cwædon, La hú, ne is ðes se wælhreowa ehtere cristenra manna: húmeta bodað he Cristes geleafan? Saulus soðlice micclum swyðrode, and ða Iudeiscan gescende, mid anrædnysse seðende, þæt Crist is Godes Sunu." "Hwæt ða, æfter manegum dagum gereonodon ða Iudeiscan, hú hí ðone Godes cempan acwellan sceoldon, and setton ða weardas to ælcum geate ðære ceastre. Paulus ongeat heora syrwunge, and ða cristenan hine genamon, and on anre wilian aleton ofer ðone weall. And he ferde ongean to Hierusalem, and hine gecuðlæhte to ðam halgan heape Cristes hiredes, and him cydde hú se Hælend hine of heofenum gespræc. Syððan, æfter sumum fyrste, com clypung of ðam Halgan Gaste to ðam geleaffullan werode, þus cweðende, Asendað Paulum and Barnaban to ðam weorce ðe ic hí gecoren hæbbe. Se halga heap ða, be Godes hæse and gecorennysse, hí asendon to lærenne eallum leodscipum be Cristes to-cyme for middangeardes alysednysse." "Barnabas wæs ða Paules gefera æt ðære bodunge to langum fyrste. Ða æt nextan wearð him geðuht þæt hi ontwa ferdon, and swa dydon. Paulus wearð þa afylled and gefrefrod mid þæs Halgan Gastes gife, and ferde to manegum leodscipum, sawende Godes sæd. On sumere byrig he wæs twelf monað, on sumere twa gear, on sumere ðreo, and gesette biscopas, and mæsse-preostas, and Godes ðeowas; ferde siððan forð to oðrum leodscipe, and dyde swa gelice. Asende þonne eft ongean ærend-gewritu to ðam geleaffullum ðe he ær tæhte, and hí swa mid þam gewritum tihte and getrymde to lifes wege."