We willað nu mid sumere scortre trahtnunge þas rædinge oferyrnan, and geopenian, gif heo hwæt digles on hyre hæbbende sy. Paulus ehte cristenra manna, na mid niðe, swa swa ða Iudeiscan dydon, ac he wæs midspreca and bewerigend þære ealdan ǽ mid micelre anrædnysse: wende þæt Cristes geleafa wære wiðerwinna ðære ealdan gesetnysse: ac se Hælend ðe gesette ða ealdan ǽ mid mislicum {390} getacnungum, se ylca eft on his andweardnysse hí awende to soðfæstnysse æfter gastlicre getacnunge. Þa nyste Paulus ða gastlican getacnunge ðære ǽ, and wæs forði hyre forespreca, and ehtere Cristes geleafan. God Ælmihtig, þe ealle ðing wát, geseah his geðanc, þæt hé ne ehte geleaffulra manna ðurh andan, ac ðurh ware ðære ealdan ǽ, and hine ða gespræc of heofonum, ðus cweðende, "Saule, hwí ehtst ðu mín? Ic eom seo Soðfæstnys ðe ðu werast; geswic ðære ehtnysse: derigendlic bið ðe þæt þu spurne ongean þa gáde. Gif se oxa spyrnð ongean ða gáde, hit dereð him sylfum; swa eac hearmað þe ðin gewinn togeanes me." He cwæð, "Hwí ehtst ðu mín?" forðan ðe he is cristenra manna heafod, and besargað swa hwæt swa his lima on eorðan ðrowiað, swa swa he ðurh his witegan cwæð, "Se ðe eow hrepað, hit me bið swa egle swylce he hreppe ða seo mines eagan." He wearð astreht, þus cweðende, "Hwæt eart ðu, Hlaford?" His modignes wearð astreht, and seo soðe eadmodnys wearð on him aræred. He feoll unrihtwis, and wearð aræred rihtwis. Feallende he forleas lichamlice gesihðe, arisende he underfeng his modes onlihtinge. Þry dagas he wunode butan gesihðe, forðan ðe he wiðsóc Cristes ærist on ðam ðriddan dæge.