Annanias is gereht, on Hebreiscum gereorde, 'scép.' Þæt bilewite scép ða gefullode ðone arleasan Saulum, and worhte hine arfæstne Paulum. He gefullode ðone wulf and geworhte to lambe. He awende his naman mid ðeawum; and wæs ða soðfæst bydel Godes gelaðunge, seðe ær mid reðre ehtnysse hi geswencte. He wolde forfleon syrewunge Iudeiscre ðeode, and geðafode þæt hine man on anre wilian ofer ðone weall nyðer alét: na þæt hé nolde for Cristes geleafan deað þrowian, ac forði he forfleah ðone ungeripedan deað, forðan ðe he sceolde ærest menigne mann mid his micclum wisdome to Gode gestrynan, and syððan mid micelre geðincðe to martyrdome his swuran astreccan. Micele maran witu he ðrowode siððan for Cristes naman, ðonne he ǽr his gecyrrednysse {392} cristenum mannum gebude. Saulus se arleasa beswáng ða cristenan, ac æfter ðære gecyrrednysse wæs se arfæsta Paulus for Cristes naman oft beswungen. Æne hé wæs gestæned oð deað, swa þæt ða ehteras hine for deadne leton, ac ðæs on merigen hé arás, and ferde ymbe his bodunge. He wæs gelomlice on mycelre frecednysse, ægðer ge on sǽ ge on lánde, on westene, betwux sceaðum, on hungre and on ðurste, and on manegum wæccum, on cyle, and on næcednysse, and on manegum cwearternum: swa hé onette mid þære bodunge, swylce hé eal mennisc to Godes ríce gebringan wolde: ægðer ge mid láre, ge mid gebedum, ge mid gewritum hé symle tihte to Godes willan. He wæs gelæd to heofonan oð ða ðriddan fleringe, and þær hé geseh and gehyrde Godes digelnysse, ða hé ne moste nanum men cyðan. Hé besargode mid wope oðra manna synna, and eallum geleaffullum hé æteowde fæderlice lufe. Mid his hand-cræfte he teolode his and his geferena forðdæda, and ðær-to-eacan nis nan ðing tocnawen on soðre eawfæstnysse þæt his lareowdom ne gestaðelode. Þa oðre apostoli, be Godes hæse, leofodon be heora láre unpleolice; ac ðeah-hwæðere Paulus ana, seðe wæs on woruld-cræfte teld-wyrhta, nolde ða alyfdan bigleofan onfón, ac mid agenre teolunge his and his geferena neode foresceawode. His lára and his drohtnunga sind ús unasmeagendlice, ac se bið gesælig þe his mynegungum mid gecneordnysse gehyrsumað. EUANGELIUM. Dixit Simon Petrus ad Iesum: et reliqua. "He forlét ealle woruld-ðing, and ðam Hælende anum folgode," swa swa ðis godspel cwyð, ðe ge nú æt ðisre ðenunge gehyrdon. "On ðære tíde cwæð Petrus se apostol to ðam Hælende, Efne we forleton ealle woruld-ðing, and ðe ánum fyligað: hwæt dest ðu us þæs to leane?" et reliqua.