Micel truwa hwearftlode on Petres heortan: he ána spræc {394} for ealne ðone heap, "We forleton ealle ðing." Hwæt forlet Petrus? He wæs fiscere, and mid ðam cræfte his teolode, and ðeah hé spræc mid micelre bylde, "We forleton ealle ðing." Ac micel he forlét, and his gebroðru, ðaða hí forleton ðone willan to agenne. Þeah hwá forlæte micele æhta, and ne forlæt ða gitsunge, ne forlæt he ealle ðing. Petrus forlet lytle ðing, scripp and net, ac he forlet ealle ðing, ðaða he, for Godes lufon, nan ðing habban nolde. He cwæð, "We fyligað ðe." Nis na fulfremedlic fela æhta to forlætenne, buton he Gode folgige. Soðlice ða hæðenan uðwitan fela ðinga forleton, swa swa dyde Socrates, seðe ealle his æhta behwyrfde wið anum gyldenum wecge, and syððan awearp ðone wecg on wídre sǽ, þæt seo gitsung ðæra æhta his willan ne hrémde, and abrude fram ðære woruldlican lare ðe he lufode: ac hit ne fremede him swa gedón, forðan ðe he ne fyligde Gode, ac his agenum willan, and forði næfde ða heofenlican edlean mid þam apostolum, þe ealle woruld-ðing forsawon for Cristes lufon, and mid gehyrsumnysse him fyligdon. Petrus ða befrán, "Hwæt sceal us getimian? We dydon swa swa ðu us hete, hwæt dest ðu us to edleane? Se Hælend andwyrde, Soð ic eow secge, þæt ge ðe me fyligað sceolon sittan ofer twelf dómsetl on ðære edcynninge, ðonne ic sitte on setle mines mægenðrymmes; and ge ðonne demað twelf Israhela mægðum." Edcynninge he het þæt gemænelice ærist, on ðam beoð ure lichaman ge-edcynnede to unbrosnunge, þæt is to ecum ðingum. Tuwa we beoð on ðisum life acennede: seo forme acennednys is flæsclic, of fæder and of meder; seo oðer acennednys is gastlic, ðonne we beoð ge-edcennede on ðam halgan fulluhte, on ðam us beoð ealle synna forgyfene, ðurh ðæs Halgan Gastes gife. Seo ðridde acennednys bið on ðam gemænelicum æriste, on ðam beoð ure lichaman ge-edcennede to unbrosnigendlicum lichaman. On ðam æriste sittað þa twelf apostoli mid Criste on heora {396} domsetlum, and demað þam twelf mæigðum Israhela ðeode. Þis twelffealde getel hæfð micele getacnunge. Gif ða twelf mægða ána beoð gedemede æt ðam micclum dome, hwæt deð þonne seo ðreotteoðe mæigð, Leui? Hwæt doð ealle ðeoda middangeardes? Wenst ðu þæt hí beoð asyndrode fram ðam dome? Ac ðis twelffealde getel is geset for eallum mancynne ealles ymbhwyrftes, for ðære fulfremednysse his getacnunge. Twelf tida beoð on ðam dæge, and twelf monðas on geare; twelf heahfæderas sind, twelf witegan, twelf apostoli; and ðis getel hæfð maran getacnunge ðonne ða ungelæredan undergitan magon. Is nu forði mid ðisum twelffealdum getele ealles middangeardes ymbhwyrft getacnod.