pervertat nostram interpretationem, quam speramus ex Dei gratia, non causa jactantiæ, nos studiose secuti valuimus interpretari. Precor modo obnixe almitatem tuam, mitissime Pater SIGERICE, ut digneris corrigere per tuam industriam, si aliquos nevos malignæ hæresis, aut nebulosæ fallaciæ in nostra interpretatione repperies: et adscribatur dehinc hic codicillus tuæ auctoritati, non utilitati nostræ despicabilis personæ. Vale in Deo Omnipotenti jugiter. Amen. * * * * * PRÆFATIO. Ic Ælfric munuc and mæssepreost, swa þeah waccre þonne swilcum hadum gebyrige, wearð asend on Æþelredes dæge cyninges fram Ælfeage biscope, Aðelwoldes æftergengan, to sumum mynstre þe is Cernel gehaten, þurh Æðelmæres bene ðæs þegenes, his gebyrd and goodnys sind gehwær cuþe. Þa bearn me on mode, ic truwige þurh Godes gife, þæt ic ðas boc of Ledenum gereorde to Engliscre spræce awende; na þurh gebylde mycelre lare, ac forþan þe ic geseah and gehyrde mycel gedwyld on manegum Engliscum bocum, þe ungelærede menn þurh heora bilewitnysse to micclum wisdome tealdon; and me ofhreow þæt hí ne cuþon ne næfdon þa godspellican lare on heora gewritum, buton þam mannum anum ðe þæt Leden cuðon, and buton þam bocum ðe Ælfred cyning snoterlice awende of Ledene on Englisc, þa synd to hæbbene. For þisum antimbre ic gedyrstlæhte, on Gode truwiende, þæt ic ðas gesetnysse undergann, and eac forðam þe menn behofiað godre lare swiðost on þisum timan þe is geendung þyssere worulde, and beoð fela frecednyssa on mancynne ærðan þe se ende becume, swa swa ure Drihten on his godspelle cwæð to his leorning-cnihtum, "Ðonne beoð swilce {4} gedreccednyssa swilce næron næfre ær fram frymðe middangeardes. Manega lease Cristas cumað on minum naman, cweðende, 'Ic eom Crist,' and wyrcað fela tacna and wundra, to bepæcenne mancynn, and eac swylce þa gecorenan men, gif hit gewurþan mæg: and butan se Ælmihtiga God ða dagas gescyrte, eall mennisc forwurde; ac for his gecorenum he gescyrte þa dagas." Gehwá mæg þe eaðelicor ða toweardan costnunge acuman, ðurh Godes fultum, gif hé bið þurh boclice lare getrymmed; forðan ðe þa beoð gehealdene þe oð ende on geleafan þurhwuniað. Fela gedreccednyssa and earfoðnysse becumað on þissere worulde ǽr hire geendunge, and þa synd ða bydelas þæs ecan forwyrdes on yfelum mannum, þe for heora mándædum siððan ecelice þrowiað on ðære sweartan helle. Þonne cymð se Antecrist, se bið mennisc mann and soð deofol, swa swa ure Hælend is soðlice mann and God on anum hade. And se gesewenlica deofol þonne wyrcð ungerima wundra, and cwyð þæt he sylf God beo, and wile neadian mancynn to his gedwylde; ac his tima ne bið na langsum; forþan þe Godes grama hine fordeð, and þeos weoruld bið siððan geendod. Crist ure Drihten gehælde untrume and adlige, and þes deofol þe is gehaten Antecrist, þæt is gereht, ðwyrlic Crist, aleuað and geuntrumað ða halan, and nænne ne gehælð fram untrumnyssum, buton þam anum þe he sylf ær awyrde. He and his gingran