5. Sacerdos Missam celebraturus transiens ante altare, ubi fit populi Communio, _non_ debet permanere genuflexus, quousque terminetur Communio. 5 Jul. 1698 in u. Collen. ad 17.--In quaestione: quomodo se gerere debeat sacerdos celebraturus, dum _transit_ ante altare, in quo sit _publice expositum_ Ss. Sacramentum? An post factam genuflexionem detecto capite, _surgens_ debeat _caput tegere_, donec ad altare pervenerit? an vero _detecto_ capite _iter prosequi_ ob reverentiam tanti Sacramenti sic publice expositi, cum rubrica Missalis Romani non videatur loqui de hac praecisa adoratione in casu de quo agitur? _servandae sunt rubricae Missalis Romani, quae videntur innuere, quod post factam adorationem genibus flexis, detecto capite, surgens caput operiat._ 24 Jul. 1638 in u. Urb. 6. Tam _in ingressu Sacerdotis ad altare, quam ante principium Missae, reverentia Sacerdotis debet esse profunda capitis et corporis_, non capitis tantum, _inclinatio_, juxta rubricam 8. April. 1808. in u. Compostell. ad 5.--_In accessu_ ad altare, in quo habetur Ss. Sacramentum, sive expositum, sive in tabernaculo reconditum _et in recessu, in plano est genuflectendum; in infimo autem gradu altaris, quoties_ (alias ante altare) _genuflectere occurrat_ (e. g. in principio Missae). 12. Nov. 1831 in u Mars. ad 51.--Inter Missam privatam a ministro _in transitu tantum ante medium altaris genuflectendum_, (si Ss. Sacramentum inclusum est in tabernaculo), _vel inclinandum_. 12. Aug. 1854 ad 70 et 71 (Anal. II. 2200). 7. _Si multae sunt particulae consecrandae, satius est eas ponere in pixide;[7] si paucae poni possunt in alia patena; nunquam vero in alio Corporali complicato._ 12. Aug. 1854 ad 19 (Anal. II. p. 2192) 8. In Missis privatis _non_ potest permitti ministro aperire Missale et invenire Missam; _et serventur rubricae_. 7. Sept. 1816 in u. Tuden. ad 11; _neque_ potest permitti ministro, si fuerit sacerdos vel diaconus sive subdiaconus, ut praeparet calicem, et ipsum extergat in fine post ablutiones. Ibid. ad 12. Ad § III. _De principio Missae et Confessione facienda._ _In Missa dicendum est_ Confiteor _pure et simpliciter, prout habetur in Missali Romano, absque additione alicujus Sancti etiam Patroni_, nisi adsit speciale indultum Apostolicae Sedis. 13. Febr. 1666 in u. Ord. Min. ad 5; Jul. 1704 in u. Valent. Ad § IV. _De Introitu, Kyrie, et Gloria._ In quaestione: an post signum crucis, quod fit in fine "Gloria in excelsis", "Credo" et "Sanctus" manus sint jungendae, etiamsi nihil hujusmodi praescribat rubrica? _serventur rubricae_, 12. Nov. 1831 in u. Mars. ad 30. Ad § V. _De Oratione._ _Congruit, ut fert praxis universalis, praesertim Urbis_, quod fiat inclinatio capitis, cum pronunciatur nomen Ss. Trinitatis, sicut fit, cum profertur nomen Jesus. 7. Sept. 1816 in u. Tuden. ad 40. Ad § VI. _De Epistola usque ad Offertorium._ 1. _Juxta rubricas in elevatione oculorum crux est aspicienda._ 22. Jul. 1848 in u. Adiacen. ad. 3.