LE naturel de nos Sauuages est de soy liberal, & point malitieux: ils ont l'esprit assez gaillard & net, quant à l'estime, & iugement des choses sensibles, & communes & deduisent fort gentiment leurs raisons, les assaisonnant tousiours auec quelque iolie similitude. Ils ont fort bonne memoire des choses corporelles, cõme de vous auoir veu, des qualitez d'vne place, où ils auront esté, [37] de ce qui aura esté fait devãt eux, despuis vingt & trente ans, &c. Mais d'apprendre par coeur, là est l'escueil: il n'y a moyen de leur mettre dans la caboche vne tirade rengée de paroles. Ils n'ont point de barbe, autant peu les hõmes que les f[~e]mes, horsmis quelques vns plus robustes, & virils. Souuent ils m'ont dit, [~q] nous leur semblions du commencem[~e]t fort laids, auec nos cheueux, aussi bien sur la bouche que dessus la teste: mais peu à peu ils s'accoustument, & nous commençons à ne plus leur paroistre si difformes. Vous ne sçauriez recognoistre les ieunes garçõs d'auec les ieunes filles, sinon à la façon de se ceindre. Parce que les femmes se ceign[~e]t dessus & dessous le ventre, & sont plus couuertes que les masles: elles sont aussi d'ordinaire plus parées de matachias: c'est à dire, de [38] chaines, & affiquets, & semblables parures à leur mode: à ce que vous sçachiez que par tout telle est la nature du sexe, amoureuse d'embellissem[~e]t. Vniuersellem[~e]t parlant ils sont de taille vn peu moindre que nous, principalem[~e]t quant à l'espaisseur: Belle toutesfois & bien prinse, comme si nous demeurions en l'estat qu'auons à l'age de vingt & cinq ans. Vous ne r[~e]cõtreriez point entr'eux vn v[~e]tru, bossu, ny contre-fait: ladres, gouteux, pierreux, insensés, ils ne sçauent que c'est: ceux d'entre nous qui sont tarez, comme borgnes, lousches, camus, &c. sont aussi tost remarqués par eux, & mocqués largement, specialem[~e]t par derriere, & quand ils sont entr'eux: car ils sont bons compagnons, & ont le mot & sobriquet à commandement, fort aises quand ils se pensent auoir occasion de [39] nous mespriser. Et certes (à ce que ie vois) c'est vne contagion dont personne n'est exempte que par la misericorde de Dieu: que de se trop estimer soy-mesme. Vous verriez ces pauures barbares, nonobstant leurs si grands manquements de police, de puissance, de lettres, d'arts & de richesse: neãtmoins tenir si grãd compte d'eux, qu'ils nous en dépris[~e]t beaucoup, se magnifiants par dessus nous. CHAPTER IV. ON THE CHARACTER, DRESS, DWELLINGS, AND FOOD OF THE SAVAGES.