quod si nos aperire ipsosque detegere voluissemus, in nostra id sæpe manu fuisset. Ipsi met postea sæpe ac coram ministris nostram fidem collaudarunt in Anglia ipsis admirantibus inimicis veritatis. His defuncti periculis, Angli constituerunt in Angliam redire potius quam in Virginiam quæ tanto distabat longius et ad quam repetendam deerant necessaria omnia. Ita in Angliam tetendimus. Longa fuit navigatio et varia: tandem caligine ac nubibus decepti recto [17] cursu decidimus inque Walliam non longe ab Hybernia delati sumus. In Wallia capitaneus noster cum ad urbem Pembrochium excendisset victus petendi causa ad certa quædam indicia velut pirata captus est ac detentus. Ille enim vero ut se liberaret negat se piratam; argumentumque innocentiæ suæ profert Jesuitas duos quos in navi haberet, quosque si placeat accersere ex ipsis cognosci posse veritatem. O artificium divinæ Providentiæ! Erat tunc hyems adulta, et omnia in navi deerant. Ideoque nisi nobis provisum fuisset et frigore ac malis peribamus. Quid multa? [18] Extemplo accersuntur Jesuitæ et in urbem mirantibus omnibus deducuntur. Jubemur pro testimonio dicere. Nos enim vero quæ vera erant proferimus, capitaneum scilicet nostrum officiarium esse regium non piratam, et quæ in nos fecisset parendi necessitate magis quam voluntate fecisse: Ita capitaneus noster liberatus est et nos cum ipso in urbe usquedum Londino responsum acciperetur perhumaniter retenti sumus. Diu expectatum est responsum, at nos interea sæpe cum ministris sæpius cum aliis disputavimus: licebat enim fere [19] omnibus adire nos; etsi nobis exire domo non licebat. Verum cætera omnia humaniter ut dixi tribuebant. Pembrochio denique jubemur Londinum navigare. Sed iter fuit longum. Otiosissimæque intercesserunt moræ quas ne usque percenseam hoc sufficiat dicere, anglici regis jussu nos ab itinere abductos esse ad urbem Dueram atque inde Caletum in Galliam missos. Caleti liberaliter accepti sumus a domino Gubernatore et decano urbis ac per tres dies recreati; hinc venimus Ambianium ubi nunc sumus.