visitez de plusieurs personnes, iusques là qu'vn des Anci[~e]s m'a dit qu'il a veu iusques à vingt nauires dans le port de Tadoussac; mais maintenant que ceste traitte a esté accordee à l'association qui est auiourd'huy priuatiuement à tous autres, lon ne void plus icy que deux nauires qui appartiennent à l'Association, & ce, vne fois l'an seulement, enuiron le commencement du mois de Iuin. Ces deux nauires apportent toutes les marchandises que ces Messieurs traictent auec les Sauuages, c'est à sçauoir des capaux, des couuertures, bonnets de nuict, chapeaux, chemises, draps, haches, fers de fleches, aleines, espees, des tranches pour rompre la glace en Hyuer, des coutteaux, des chaudieres, pruneaux, raisins, du bled d'Inde, des pois, du biscuit, ou de la galette, & du petun; & outre ce qui est necessaire pour le viure des François, qui demeur[~e]t en ce païs là, en eschange ils emportent des peaux d'orignac, de loup ceruier, de regnard, de loutre, & quelquefois il s'en rencontre de noires, de mattre, de blaireau, & de rat musqué; mais principalement de Castor, qui est le plus grand de leur gain: On m'a dit que pour vne annee ils en auoient remporté iusques à 22000. L'ordinaire de chaque année est de 15000. ou 12000. à vne pistole la piece, ce n'est pas mal allé; il est bien vray que les frais qu'ils font sont assez grands, ayant icy quarante personnes & plus qui sont gagez & nourris; outre les frais de tout l'equipage de deux nauires, où il se retrouue bien 150. hõmes qui reçoiuent des gages & se nourrissent. Ces gages ne sont pas tous d'vne façon: L'ordinaire est de 106. liures, il y en a qui ont cent escus. Ie cognois vn Truchement qui a cent pistoles, & quelque nombre de peaux qu'il luy est permis d'emporter chaque annee. Il est vray qu'il les traicte de sa marchãdise. Vostre Reuerence le verra ceste annee, c'est vn de ceux qui nous ont grandement aidé. Vostre Reuerence lui fera, s'il luy plaist, bon raqueil; il est pour retourner & rendre icy de grands seruices à N. Seigneur. Reste maintenant [10] à mander à vostre Reuerence ce que nous auons fait depuis nostre arriuee en ce païs, qui fut à la fin de Iuin. Le mois de Iuillet & d'Aoust se passerent, partie à escrire des lettres, partie à nous recognoistre vn peu dans le païs, & à chercher quelque lieu propre pour y establir nostre demeure: Afin de tesmoigner aux RR. PP. Recolects, que nous desiriõs les deliurer au plustost de l'incõmodité que nous leur apportions. Apres auoir bien consideré tous les endroits, & apres auoir pris langue des François, & principalement des Reuerends Peres Recolects le 1. iour de Septembre nous plantasmes la saincte Croix, au lieu que nous auions choisi, auec toute la solemnité qui nous fut possible. Les Reuerends Peres Recolects y assisterent auec les plus apparens des François, qui apres le disner se mirent tous à trauailler. Nous auons depuis tousiours continué, nous cinq, à desraciner ler [les] arbres, & à bescher la terre tant que le t[~e]ps nous a permis.