Les neiges venantes nous fusmes contraints de sursoir iusques au Prin-temps pendant le trauail nous ne laissions pas de penser comment nous viendrions à bout du langage du païs; car des Truchemens, disoit-on il ne faut rien attendre; si est-ce neantmoins qu'apres auoir recommandé l'affaire à Dieu, i'ay pris resolution de m'addresser au Truchement de ceste Nation, quitte, disie en moy-mesme pour estre refusé aussi bien que les autres. Donc apres m'estre efforcé par des exhortations que ie faisois & par nostre conuersation, de donner d'autres impressiõs de nostre Compagnie, qu'on n'auoit en ce païs, Vostre Reuerence croiroit-elle bien que nous y auõs trouué l'Anti-Coton, que lon faisoit courir de chambre en chambre, & qu'enfin lon a bruslé quatre mois apres nostre arriuee; ayant, disie, tasché de donner d'autres impressions. Ie m'adressay donc au Truchement de ceste Nation, & le priay de nous donner cognoissance du langage. Chose estrãge, il me promist sur l'heure, qu'il me donneroit pendant l'hyuer tout le cõtentement que ie pourrois desirer de luy. Or c'est icy où il faut admirer vne particuliere prouidence de Dieu: car il faut remarquer, que le General estoit chargé de ses associez de repasser en France, ou bien de luy diminuer ses gages & luy pressoit si fort de retourner la mesme annee que nous arriuasmes qu'il fallut que le General vsast de commandement absolu auec asseurance que ses gages ne luy seroient [11] point diminuees, pour le faire demeurer cette annee; & de fait il est demeuré à nostre grand contentement. _Secundo notandum_; Que ce Truchement n'auoit iamais voulu communiquer a personne la cognoissance qu'il auoit de ce langage, non pas mesme aux RR. PP. Recolects, qui depuis dix ans n'auoient cessé de l'en importuner; & cependant à la premiere priere que ie luy fis, me promist ce que ie vous ay dit, & s'est acquité fidelement de sa promesse pendant cet Hyuer. Or neantmoins parce que nous n'estions pas asseurez qu'il deust estre fidele en sa promesse, craignans que l'Hyuer se passast sans rien auancer en la cognoissance de la langue. Ie consultay auec nos Peres, s'il ne seroit point à propos que deux de nous allassent passer l'Hyuer auec les Sauuages, bien auant dans les bois, afin que leur hantise nous donnast la cognoissance que nous cherchions; nos Peres fur[~e]t d'auis que ce seroit assez qu'vn y allast, & que l'autre demeureroit pour satisfaire à la deuotion des François. Ainsi ce fut le P. Brebeuf qui eut ce bonheur; il partit le 20. d'Octobre, & retourna le 27. de Mars, ayant tousiours esté esloigné de nous de 20. ou 25. lieux. Pendant son absence ie sommay le Truchement de sa promesse à laquelle il ne manqua point; A peine eusie tiré de luy ce que ie desirois, que ie me resolus d'aller passer le reste de l'Hyuer auec le premier Sauuage qui nous viendroit voir; Ie m'y en allay donc le 8. de Ianuier; mais ie fus contraint de retourner 11. iours apres; car ne trouuans pas dequoy viure eux-mesme, ils furent