contraints de retourner voir les François. A mon retour, sans perdre temps, ie sollicitay le Truchement d'vne autre Nation de me communiquer ce qu'il sçauoit; dont ie m'estonne comme il le fit si franchement, ayant esté par le passé si reserué a l'endroit des Reuerends Peres Recolets. Il nous donna tout ce que nous luy demandasmes; il est bien vray que nous ne luy demandasmes pas tout ce qu'eussions bien desiré; car comme nous recogneusmes en luy vn esprit assez grossier, ce n'eust pas esté nostre aduantage de le presser par de la sa portee, nous fusmes neantmoins tres contens de ce qu'il nous donna; & ce qui est à remarquer afin de recognoistre d'auantage la prouidence de Dieu en ce fait, cedit Truchement s'en deuoit retourner en France la mesme annee que nous ariuasmes, & ce par l'entremise des Peres Recolets, & de nous qui le iugiõs necessaire pour [12] le bien de son ame, & de fait nous l'emportasmes pardessus le General de la flotte, qui a toute force le vouloit renuoyer en la Nation de laquelle il est Truchement, le voila donc arriué icy où nous sommes auec des François qui reuenoient de la traitte, en resolution de s'en retourner en France, les vaisseaux sont sur le point de partir: la veille du depart il vint nous voir chez les Reuerends Peres Recolets pour nous dire Adieu. Ce grand Dieu fit ioüer tout à propos vn ressort de sa Prouidence, comme il estoit chez nous voila vne forte pleuresie qui le prend & le voilà couché au lict, si bien & si beau qu'il fallut que les vaisseaux s'en retournassent sans luy; & par ce moyen le voilà qui nous demeure, hors des dangers neantmoins de se perdre, ce qui nous auoit fait solliter son retour. Ie vous laisse à penser si pendant sa maladie nous oubliasmes de luy rendre tout deuoir de charité; il suffit de dire qu'auparauant qu'il fust releué de ceste maladie, pour laquelle il n'attendoit que la mort; il nous asseura qu'il estoit entierement à nostre deuotion, & que s'il plaisoit à Dieu luy rendre la santé, l'Hyuer ne ce passeroit iamais sans nous donner tout contentement, dequoy il s'est fort bien acquitté, graces à Dieu.