profit tout le temps qu'il luy plaira me conseruer en vie, pourueu qu'il eust nos trauaux agreables, & qu'il voulust s'en seruir comme de preparation pour ceux qui viendront apres nous, ie me tiendrois trop heureux d'employer & ma vie & mes forces, & n'épargner rien de ce qui seroit en mon pouuoir, non pas mesme mon sang pour semblable suiet. Neantmoins si nos Superieurs ne sont point d'aduis qu'on passe outre, me voicy tout prés de me sousmettre à leur volonté, & suiure leur iugement. Voicy vn petit Huron qui s'en va vous voir, il est passionné de voir la France. Il nous affectionne grandement & fait paroistre vn grand desir d'estre instruict; neantmoins le pere & le Capitaine de la nation, le veulent reuoir l'an prochain, nous asseurant que s'il est contant il le nous donnera pour quelques annees. Il est fort important de le bien contenter; car si vne fois cet enfant est bien instruit, voila vne partie ouuerte pour entrer en beaucoup de nations où il seruira grandement. Et tout à propos le truchement de cetre [cette] nation la est retourn[é] en France. Truchement qu'il aime tant, qu'il l'appelle son pere. Ie prie nostre Seigneur qu'il luy plaise benir le voyage. Au reste ie remercie V. R. du courage [16] qu'elle m'a donné. I'ay leu ses lettres, quatre ou cinq fois; mais ie n'ay peu gaigner sur moy que ce n'ait esté la larme à l'oeil, pour plusieurs raisons, mais specialement sur la souuenance de mes imperfections (_coram Deo loquor_) qui m'éloignent grandement, du merite de cette vocation, & me fait viuement apprehender que ie n'aille trauerser les desseins de la grace de Dieu, en l'établissement du Christianisme en ce pays. Apres cela ie ne crains rien. Ie vous supplie en vertu de ce que vous aimez mieux dans le Ciel, de ne vous lasser point de solliciter la diuine bonté, ou qu'il me face la grace de m'en défaire, ou si mon idignité est venuë iusques là qu'il m'y faille encore tremper, que ce ne soit au preiudice de nos pauures Sauuages; que ma misere n'empesche point les effects de sa misericorde, & le desordre de ma volonté fragile, l'ordre que sa bonté veut établir en ce pays. Nous continuons plus que iamais les bonnes intelligences auec le Pere Ioseph, qui est icy l'vnique Prestre de son Ordre, l'vn estant allé auec nos Peres aux Hurons; & l'autre s'en retournant en France; il a deux bons freres auec luy. Mr. Champlain est tousiours fort affectionné en nostre endroit, m'a pris pour directeur de sa conscience, aussi bien que Gaumont, duquel i'auray vn soin particulier selon les recommandations de vostre R. L'aduis que vostre R. me donne touchant la dedicace de nostre premiere Eglise, est fort conforme à ma deuotion si les Superieurs m'en laissent la liberté, elle ne sera iamais appellee autrement que N. Dame des Anges; c'est pourquoy ie supplie V. R. de nous faire auoir quelque beau Tableau enuironné d'Anges. C'est vne des grãdes Festes des PP. Recolets, qui ont dedié leur Chappelle à S. Charles; & la Riuiere sur laquelle, eux