Les Iesuites n'estoyent iusques alors recognus des Anglois, sinon que pour Prestres. Or le P. Biard & le P. Enemond Massé s'en aller[~e]t au nauire parler au Capitaine Anglois, & luy expliquer[~e]t ouuertement comm'ils estoy[~e]t Iesuites, venus en ces quartiers-là pour la cõuersiõ des Sauuages, puis le supplierent par le sang de celuy, qu'il recognoissoit pour Sauueur, & [243] par les misericordes qu'il en attendoit, qu'il luy pleust auoir pitié de ces pauures François, sur lesquels Dieu luy auoit dõné puissance, & qu'en leur misere il recognust combien les affaires de ce monde varient: qu'il luy pleust leur donner & leur moyenner retour en leur pays de France. Le Capitaine les ouyt fort paisiblement, & leur respondit auec pareil honneur: mais (dit-il) dissimulant, ie m'estonne fort comme vous autres Iesuites, lesquels on tient communement pour gens de conscience, & de Religion, vous vous retrouuiez icy, neantmoins en la compagnie des forbans, & picoreurs, gens sans adueu & sans loy, ny honneur. Le P. Biard respondit & preuua auec tant d'arguments, que toute leur troupe estoit de gens de bien, & recommandés par sa Majesté [244] tres-Chrestienne: & refuta si peremptoirement toutes objections contraires, que le Capitaine Anglois fut contrainct de faire semblant, qu'il s'y accordoit, vaincu par ses raisons. Certes (adiousta-il) il y a bien eu de la faute, à ce que ie voy, d'ainsi perdre vos lettres. Neantmoins ie traicteray de vostre retour auec vostre Capitaine, & dés lors iusques au depart, il fit tousiours manger à sa table lesdits deux Peres, leur mõstrant beaucoup de respect & hõnesteté. Or il auoit vn'espine au pied, qui le tourmentoit; c'estoit le Pilote, & les Matelots, qui estoyent euadés, & desquels il ne pouuoit sçauoir nouuelles. Ce Pilote appellé le Bailleur, de la ville de Roüen, s'en estant allé pour recognoistre (ainsi que vous a esté dit) ne peut point retourner à temps au nauire pour le def[~e]dre, [245] & partant il retira sa chaloupe à l'escart, & la nuit venuë print encores auec soy les autres Matelots, & se mit en sauueté hors la veuë, & le pouuoir des Anglois. De nuict il nous venoit trouuer pour auiser auecques nous ce qui seroit de faire. Il fit en particulier ce bon office aux Iesuites: car il vint trouuer le P. Biard, & le prenant par la main le coniura de ne se point meffier de luy, pource qu'il estoit de la Pretenduë, l'asseurant qu'il ne manqueroit ny à luy, ny a aucun des Peres: & qu'il supplioit Dieu, que tout ainsi il ne l'abandonnast point, comm'il le disoit de coeur syncere. Le P. Biard le remercia de bonne affection, & luy promit de se souuenir de ceste si bonne volonté: il luy dit neantmoins qu'il ne vouloit encores penser à soy, iusques à ce qu'il vit tous les autres en beau [246] chemin. Que lors il deuiendroit ce qu'à Dieu plairoit, admonnestant ledit Pilote de se garder de tomber és mains des Anglois: parce que le Capitaine buttoit fort à le pouuoir attraper. Ledit Pilote