Là dessus le sieur de Champlain prit la parolle, & leur fit dire qu'il les auoit tousiours aimés, qu'il desiroit grandement de les voir comme ses freres, & qu'aiant esté enuoié de la part de nostre grand Roy pour les proteger, qu'il le feroit très-volontiers: qu'il auoit enuoié au deuant d'eux vne barque & une chalouppe, & que les Hiroquois anoient tué trois de nos hõmes en trahison, que cela ne luy faisoit point perdre cœur, que les François ne craignoient rien, & qu'ils cherissoient grandement leurs amis: qu'ils ne creussent point ceux qui les voudroient diuertir de les venir voir, & que leur ayant donné leur parolle ils estoient veritables, ainsi qu'ils l'auoient [276 i.e., 176] peu remarquer par le passé qu'il recognoissoit encor les vieillards de leur nation pour auoir esté à la guerre auec eux: qu'il les remercioit de leurs presens, & qu'il sçauroit bien les recognoistre. Il adiousta que nos Peres les alloient voir en leur païs en témoignage de l'affectiō que nous leur portions, disant des merueilles en nostre faueur. Ce sont nos Peres, leur disoit-il, nous les aimons plus que nos enfans & que nous mesmes: on fait grand estat d'eux en France, ce n'est point la faim ny la disette qui les amene en ce païs cy: ils ne vous vont pas voir pour vos biens ny pour vos pelleteries. Voicy Louïs Amantacha de vostre nation, qui les cognoist, & qui sçait biẽ que ie dy vray: si vous aimez les François comme vous dites, aimez ces Peres, honorez les, il vous enseigneront le chemin du Ciel, c'est ce qui leur fait [177] quitter leur païs & leurs amis & leurs commodités pour vous instruire, & notamment pour enseigner à vos enfans vne si grande science & si necessaire.