amour & [10] l'accommodons le mieux qu'il nous est possible, luy tout remply d'aise & de contentement de se voir auec nous, tesmoigna vn grand desir d'estre baptizé, & de mourir Chrestien. Le lẽdemain qui estoit le 26. de Ianuier estant tombé dans vne grãde syncope nous le baptizasmes, croyãs qu'il s'en alloit mourir, luy donnans le nom de François en l'honneur de S. François Xauier, il reuint à soy, & ayant appris ce qui s'estoit passé, il se monstra plein de ioye d'estre fait Enfant de Dieu, s'entretenant tousiours iusques à la mort, qui fut deux iours apres, en diuers actes que ie luy faisois exercer tantost de Foy & d'Esperance, tantost d'Amour de Dieu & de regret de l'auoir offencé, il prenoit en cela vn plaisir fort sensible, & recitoit tout seul auec de grands sentimens ce qu'on luy auoit enseigné, demandant vn iour pardon à Dieu de ses pechez, il s'accusoit tout haut soymesme comme s'il se fust confessé, puis la memoire luy manquant, Enseigne moy (me disoit-il) ie suis vn pauure ignorant, ie n'ay point d'esprit, suggere moy ce que ie dois dire; vne autre fois il me pria de luy ietter de l'eau beniste pour l'aider à auoir douleur de ses pechez, [11] cela m'estonna, car nous ne luy auions pas encores parlé de l'vsage de cette eau, nous ayant inuité à chanter aupres de luy quelques prieres de l'Eglise, nous le voyõs pendant ce sainct exercice les yeux esleuez au Ciel auec vne posture si deuote que nous estions tous attendris, admirans les grãdes misericordes que Dieu operoit dedans cette ame, qui en fin quitta son corps fort doucement le 28. de Ianuier pour aller ioüir de Dieu."