de plus precieux, ie m'en allé chercher le [139] village, que ie rencontré heureusemẽt enuiron à trois quarts de lieuës, ayant en passant veu auec attendrissement & ressentiment le lieu où nous auions habité, & celebré le S. sacrifice de la Messe trois ans durant, cõuerty en vn beau champ; comme aussi la place du vieux village, où excepté vne cabane rien ne restoit que les ruines des autres. Ie vis pareillement l'endroit où le pauure Estienne Brulé auoit esté barbarement & traistreusement assommé; ce qui me fit pẽser que quelque iour on nous pourroit bien traitter de la sorte, & desirer au moins que ce fust en pourchassant la gloire de N. Seig. Dés aussi-tost que ie fus apperceu au village, & qu'on eust crié, voyla Echom reuenu, c'est ainsi qu'ils me nommẽt, tout le monde sortit pour me salüer & bienueigner, chacun m'appellant par mon nom, & me [140] disant: Quoy Echom, mon nepueu, mon frere, mon cousin, es tu donc reuenu? Mais sans m'arrester, parce que la nuict s'approchoit, ie prends logis, & m'y estant bien peu de temps rafraischy, ie sors aussi-tost auec vne bande de ieunes gens volontaires, pour aller reprendre mon petit bagage. Il estoit vne heure de nuict quand nous fusmes de retour au village. Ie me logeay chez vn nommé _Aouandoïé_, lequel est, ou au moins a esté vn des plus riches des Hurons. Ce que ie fis à dessein, par ce qu'vn autre moins fort eust pû estre incommodé du grand nombre de François que i'attendois, & qu'il falloit nourrir iusques à ce que nous fussions tous assemblez, & que nostre cabane fust faite. Vous pouuez vous loger où vous voulez, car ceste Nation entre toutes les autres, est fort hospitaliere enuers toute sorte [141] de personnes, mesmes enuers les Estrangers: & vous y demeurez tant qu'il vous plaist, tousiours bien traité à la façon du pays, & au partir de là vous en voyla quitte pour vn, _ho, ho, ho, outoécti_, ou vn grand mercy, au moins par entre-eux. Car des François ils attendent quelque recompense, à discretion toutesfois. Il est bien vray que tous ne sont pas également hospitaliers, il y a du plus & du moins. Mon hoste est des premiers en ceste vertu, & peut-estre est-ce pour ce sujet que Dieu l'a cõblé iusques à present de benedictiõs temporelles, & l'a preserué entre tous ses Concitoyens. Car leur village nommé _Teandeouïhata_, ayant esté bruslé par deux fois, il n'y a eu en toutes les deux fois, que sa seule maison exempte de l'embrasement. Quelques vns attribuent cela au fort; pour moy ie le rapporte à vne [142] cause plus noble; & si ie me souuiens d'vn bon trait, soit de prudence, soit d'humanité, dont il se seruit au premier embrasement; car l'enuie s'estant allumée contre luy, & quelques-vns voulant perdre sa cabane, que le feu auoit espargnée, aussi tost il fait mettre chaudiere haute, appreste vn bon festin, conuie tout le village, & les ayant assemblez, leur fait ceste harangue. Mes freres, i'ay vn tres-sensible déplaisir de l'accident qui est arriué; mais qu'y ferions nous, c'en est fait.