Quant à ce qui concerne les mœurs, les Hurons sont lascifs, quoy qu'en deux chefs moins que plusieurs Chrestiens, qui rougiront [176] vn iour deuant eux. Vous n'y verrez point de baisers, ny de caresses deshonnestez; & dans le mariage vn homme y demeurera les deux & trois ans entiers, sans cognoistre sa femme, tandis qu'elle est nourrice. Ils sont gourmands iusques à rendre gorge: vray est que cela n'est pas souuent, mais seulement en quelques festins superstitieux. Encore ne s'y trouuent-ils pas volontiers; & d'ailleurs ils supportent beaucoup mieux la faim que nous; si bien qu'apres auoir ieusné les deux ou trois iours entiers, vous en verrez encore ramer, porter, chanter, rire, gausser, cõme s'ils auoiẽt biẽ disné. Ils sont fort faineants, menteurs, larrons, importuns demandeurs. Quelques-vns les estiment vindicatifs; mais pour moy ie crois que ce vice est plus notable ailleurs qu'icy. On y voit reluire d'assez belles vertus [177] morales. Vous y remarquez en premier lieu vne grande amour & vnion, qu'ils sont soigneux de cultiuer par le moyen de leurs mariages, de leurs presens, de leurs festins, & de leurs frequentes visites. Au retour de leur pesche, de leur chasse, & de leur traitte, ils s'entredonnent beaucoup: s'ils y ont pris quelque chose d'exquis, ou mesme s'ils l'ont acheté, ou si on le leur a donné, ils en font festin à tout le village: l'hospitalité enuers toute sorte d'estrãgers y est remarquable. Ils leur presentẽt en ces festins ce qu'ils ont preparé de meilleur, & cõme i'ay desia dit, ie ne sçay si ailleurs il se recontre rien de pareil en ce sujet. Il me semble auoir leu dans les vies [des] Peres, qu'vne armée Payenne se conuertit, voyant la charité & l'hospitalité d'vne ville Chrestienne, dont les habitans s'efforçoient à l'enuy de [178] caresser & festoyer les Estrangers. Iugeant bien que ceux-là deuoient professer la vraye Religion, & adorer le vray Dieu Pere commun de tous, qui auoient vn cœur si benin, & faisoient indifferemment tant de bien à toute sorte de personnes. Nous auons aussi esperance que nostre Seigneur donnera en fin la lumiere de sa cognoissance, & communiquera l'ardeur de ses graces à cette Nation, qu'il semble y auoir disposée par la pratique de cette belle vertu. Ils ne refusent iamais la porte à vn Estranger; & l'ayans receu vne fois en leur maison, ils luy font part de ce qu'ils y ont de meilleur: ils ne luy donnent iamais son congé; & quand il le prend de soy-mesme, il en est quitte pour vn simple grand-mercy. Cela me fait esperer, que si vne fois il plaist à Dieu de les illuminer, ils correspondront parfaictement [179] aux graces & aux inspirations de son Fils. Et puis qu'il est venu comme Estranger en sa propre maison, ie me promets que ces bonnes gens le receuront à toutes heures en leur cœur, sans le faire attendre à la porte par trop de dureté; sans luy rien espargner en toute l'estenduë de leurs affections: sans le trahir & le chasser dehors par quelque