And then Heracle commaunded hym all to god and to the hooly croſſe wyth all the devocion that he myght. And thenne they fought longe / And at the laſt our lord gaf the vyctory to Heracle and ſubdued hym to his empyre / The hooſt that was contrary / and alle the peple of Coſdroe obeyed them to the Cryſten faythe / and receyved the hooly baptyſme / And Coſdroe knew not the end of the batayll / For he was adoured and worſhiped of alle the peple as a god / ſo that no man durſt ſay nay to him / And thenne Heracle came to hym / and fonde hym ſyttinge in his ſyege[34] of golde / and ſayd to hym / For as moche as after the manere thou haſt honoured the Tree of the Croſſe / yf thou wyld receyve baptym and the faythe of Iheſu Cryſt / I ſhal gete it to the / and yet ſhalt thow holde thy crowne and Royamme with lytel hoſtages / And I ſhall lete the have thy lyf / and yf thou wylt not / I ſhall flee the wyth my ſwerde / and ſhalle ſmyte of thyne heed / and whanne he wold not accorde therto / he did anon do ſmyte of his hede / and commaunded that he ſhold be buryed / by cauſe he had be(en) a Kynge /. And he fonde with hym one his ſone of the age of ten yere / whome he dyd doo baptyſe and lyft hym fro the fonte / and left to hym the Royaume of his fader / and then he dyd doo breke that Toure / And gaf the ſylver to them of his hooſte / and gaf the gold and precious ſtones for to repayre the chirches that the tyraunt had deſtroyed / and tooke the hoole croſſe / and brought it ageyne to Ieruſalem / and as he deſcended from the mount of Olyvete / and wold have entryd by the gate by whiche our ſavyour wente to his paſſyon on horſbacke adourned as a Kynge / ſodenly the ſtones of the gates deſcended / and ioyned them togyder in the gate like a wall & all the peple was abaſhed[35] / and thenne the Aungel of oure lord appyeryd upon the gate holdyng the ſigne of the ſigne (_sic_) of the Croſſe in his honde / and ſayd / Whanne the Kynge of heven went to his paſſion by this gate / he was not arayed like a Kynge / ne on horſbake / but cam humbly upon an aſſe / in ſhewynge thexample of humylite which he left to them that honoure hym. And when this was ſayd / he departed and vanyſſhed aweye / Thenne th’emperour took of his hoſen and ſhone[36] himſelf in wepynge / and deſpollyed hymſelfe of alle his clothes in to his ſherte / and tooke the croſſe of oure lord / and bare it moche humbly into the gate / and anone the hardnes of the ſtones felte the celeſtyalle commaundement / and remeved anone / and opened and gaf entree unto them that entred / Thenne the ſweete odour that was felt that day whanne the hooly Croſſe was taken fro the Toure of Coſdroe / and was brought ageyne to Iheruſalem fro ſo ferre countre / and ſo grete ſpace of londe retourned in to Iheruſalem in that moment / and replenyſſhed it with al ſwetnes / Thenne the ryght devoute Kyng beganne to ſaye the prayſynges of the Croſſe in this wyſe / O Crux ſplendydior / et cetera / O Croſſe more ſhynynge