than alle the Sterres / honoured of the world / right holy / and moche amyable to alle men / whiche only were worthy to bere the raunſon of the world Swete tree / Swete nayles / Swete yron / Swete ſpere berynge the ſwete burthens / Save thou this preſent company / that is this daye aſſembled in thy lawe and prayſynges /. And thus was the precious tree of the Croſſe re eſtablyſſhed in his place / and the auncient myracles renewed /. For a dede man was reyſed to lyf / and foure men taken with the palſey were cured and heled / +x+ lepres were made clene / and fyften blynde receyved theyr ſyghte ageyn / Devylles were put out of men / and moche peple / and many / were delyvered of dyverſe ſekenes and maladyes /. Thenne themperour dyd doo repayre the Chirches / and gaf to them grete geftes / And after retorned home to his Empyre / And hit is ſaid in the Cronycles that this was done otherwiſe / For they ſay that whanne Coſdroe hadde taken many Royammes / he took Iheruſalem / and Zacharye the patriarke / and bare aweye the tree of the Croſſe / And as Heracle wold make pees with hym / the Kyng Coſdroe ſwore a grete othe / that he wold never make pees with Cryſten men and Romayns / yf they denyed not hym that was crucyfyed / and adoured the ſonne /. And thenne Heracle / whiche was armed wythe faythe / brought his hooſte ageynſt hym / and deſtroyed and waſted the Perſyens with many batayles that he made to them / and made Coſdroe to flee unto the Cyte of thelyfonte /. And atte the laſte Coſdroe hadde the flyxe in his bely / And wolde therefore crowne his ſone Kynge / which was named Mendaſa /. And whenne Syroys his oldeſt ſone herde thereof he made alyance with Heracle / And purſewed his fader with his noble peple / and ſet hym in bondes / And ſuſteyned him with breede of trybulacion / and with water of anguyſſhe / And atte laſt he made to ſhote arowes at him bycauſe he wold not bileve in god & ſo deyde / & after this thynge he ſente to Heracle the patriarke the tree of the Croſſe and all the pryſoners / And Heracle bare into Iheruſalem the precious tree of the Croſſe /. And thus it is redde in many Cronycles alſo/. Sybyle ſayth thus of the tre of the Croſſe / that the bleſſyd tree of the Croſſe was thre tymes with the paynyms / as it is ſayd in thyſtorie trypertyte O thryſe bleſſyd tree on whiche god was ſtratched / This peradventure is ſayd for the lyf of Nature / of grace / and of glorye / which cam of the croſſe /. At Conſtantynople a Iewe entyred in to the chirche of ſeynt ſophye / and conſydered that he was there allone / and ſawe an ymage of Iheſu cryſte / and tooke his ſwerde and ſmote thymage in the throte / and anone the bloode guyſſhed oute / and ſprange in the face and on the hide of the Iewe / And he thenne was aferd and took thymage / and caſt it into a pytte / and anone fledde awey /. And it happed that a Cryſten man mett hym / and ſawe hym al blody / and ſayd to hym / fro whens