Caesariensis provincia, quam nunc totam _Dara_ regnum obsidet, antea Bocchi regnum adpellata fuit. Partem tamen inter Malvam et Mulucham Massaesylornm gens tenuit. Caput provinciae Iulia Caesarea, aliquando ignobilis, cum Iol esset; postea quia Iubae regia, illustris facta. Reliqua opida sunt Cartenna, Saldae, Opidum novum, Rusazus, Ruscurium, Rusconia, Tipasa, Tubusuptus et Tucca, impositum mari ac flumini Ampsagae. _Tingitana_. Tingitana provincia, quam nunc duo regna _Fez_ et _Morocco_ occupant, ab urbe Tingi, quae nunc vulgo _Tanger_, cognomen accepit, ante Bogudiana dicta à Rege Bogud. Opida in ea, Tingi modo dictum, caput provinciae, ab Anteeo conditum; Iulia Constantia, Zilis, Volubilia et Lixus, vel fabulosissime ab antiquis narrata. Ibi quidpe regia Antaei, certamenque cum Hercule, et Hesperidum horti. CAP. VI. _Gætuli, Atlas mons, Libya interior et Æthiopia_. _Gætuli_. A tergo Mauritaniarum Africaeque Minoris Gaetulorum gens, et ipsa quoque Romanorum armis debellata, longe lateque incoluit, quidpe quae hodie occupat quicquid terrarum à _Lempta_ opido ad Oceanum usque, spatio mill. Germanicorum CCCL protenditur. Hoc spatio nunc est _Biledulgerit_ provinciae major pars, ubi _Targa_ regnum, et quatuor deserta, _Lempta, Zuenziga, Zanhaga, Hair_. _Atlas Mons_. Gaetulos à Meridie claudit mons Atlas, totius Africae vel fabulosissimus. E mediis hunc arenis in coelum usque attolli prodiderunt celebrati auctores, asperum, squalentem, qua vergat ad litora Oceani, cui cognomen imposuit: eundem opacum nemorosumque, et scatebris fontium riguum; qua spectat Africam, fructibus omnium generum sponte ita subnascentibus, ut nunqnam satietas voluptatibus desit. Incolarum neminem interdiu cerni: silere omnia haud alio quam solitudinum horrore. Eundemque noctibus micare crebris ignibus, Ægipanum Satyrorumque lascivia impleri, tibiarum ac fistulae cantu tympanorumque et cymbalorum sonitu strepere. _Libya interior_. Vltra Atlantem Libya est interior ad Nigrum usque flumen, vastarum solitudinum, nunc desertum _Sarra_ dicta. _Æthiopia et Troglodytica_. Iam vero quicquid ultra Nigrum flumen est et Ægyptum, versus utrumque mare Atlanticum Rubrumque, Æthiopes tenuerunt, gens omnium Africae terrae amplissima, extra Africam à vetustissimis Geographorum posita. Ab Æthiope Vulcani filio cognominati; vel, ut alii, ab nigro vultus corporisque colore; [Greek: aithops] quidpe significat nigrum. Divisa fuit Æthiopia in varia Æthiopum genera; quorum Ptolemaeus innumera tradit nomina. At clarissimi omnium fuere Nigritae; à Nigro flumine dicti; et Nubiorum gens magna, unde hodieque vastissima regio dicitur _Nubia_. Ea autem Æthiopiae pars quae Nilo utrimque adjacet, Æthiopia dicitur sub Ægypto; atque in ea ad Nili paludes seu lacus Cinnamomifera regio. At totum sinus Arabici laevum larus Arabes tenuere Troglodytae, unde regio ipsa Troglodytica. CAP. VII. _De incolis universæ Africæ novaque ejus descriptione; ac primum de Ægypto_