Qvinam mortales Ægyptum antiquitus incoluerint, ante dictum set. Reliqua Africae versus Occasum mari adjacentia tenuerunt populi commemorati. Advenae autem primi fuere Phoenicum coloni aliique ex Asia atque Ægypto profecti. Postea paruit Romanis; mox Græcis Imperatoribus totum hoc terrarum spatium. Deinde Vandalis, Saracenis, Arabibus. Nunc partem tenet Turca, partem Serifus, quem vocant; partem reges alii, partem denique Hispaniarum Rex. At Æthiopes à suo solo neque recesserunt, neque in id alios colonos receperunt; id longinquitas effecit regionis immensaeque intercedentium desertorum vastitates. Sed enarrata Africae antiquitate, res postulat, uti novam etiam ejus descriptionem subjiciamus. Dividitur nunc universa in septem potissimum partes sive regiones, quarum nomina sunt haec: Ægyptus, _Barbaria, Biledulgerid, Sarra_ desertum, Nigritæ, Æthiopia Interior, sive Superior, quod Abissinorum imperium, et Æthiopia Exterior sive Inferior. _Ægyptus_. Ægypti (quam Turca obtinet) caput nunc est Cairum, vulgo _Alcair_, Chaldaeis Alchabyr, urbs magnitudine stupenda, Emporium celeberrimum, Circassiorum Ægypti Sultanoram quondam regia. Prope est _Materea_ hortus balsami fructibus consitus, quod uni terrae Iudaeae quondam concessum, hodie nisi in hoc loco, nusquam colitur. Vltra Nilum pyramides visuntur stupendae altitudinis, ut ante memoravimus. Secunda claritate à Cairo est Alexandria, splendida quondam atque opulentissima civitas, nunc crebris bellis destructa atque concisa, celeberrimum Christianis mercatoribus praebet emporium. Nobile exinde est cum arce opidum _Raschitt_, quod Europaei _Rosettam_ vocant. _Damiata_, olim Pelusium, Ptolemaei Geographi incunabulis insigne est. CAP. VIII. _Barbaria_. Ægypto continuatur nobilissima totius Africae regio Barbaria; in sex partes divisa, quarum una est provincia Barcana, quinque reliquae sunt regna, Tunetanum, Tremisenum, Fessanum, Maurocanum et Darense. _Barcana regio_. Inter Ægyptum et Tunetanum regnum litori praetenditor Barcana regio, à Barce antiqua urbe cognominata, soli asperitate pariter ac siccitate sterilis. _Regnum Tunetanum_. Tunetanum regnum veterem Africam minorem ferme totam occupat. Caput est Tunetum, sive Tunisa, vulgo _Tunisi_; insignis, vetus ac satis ampla urbs, quae ex Carthaginis ruinis crevit; emporium Venetis et Genuensibus aliisque mercatoribus celebre. Secunda est Tripolis nova, quae Tripolis Barbariae dicitur, ad differentiam Tripolis Syriae: emporium est Europæis mercatoribus celeberrimum. _Bona_ etiam, quae olim Hippo, D. Augustina Episcopatu nota, nunc emporium haud postremum. Intus vero est Constantina Romanarum antiquitatum reliquiis conspicua. _Regnum Tremisenum_. Caput regni est _Tremisen_, amplissima quondam, bellis gravissimis postea tenuata. In litore est _Algier_, emporium satis nobile, at piratica infame, Christianis mancipiis refertissimum; urbs ipsa moenibus, arcibus ac tormentis bellicis adeo munita, ut inexpugnabilis credatur. _Regnum Fessanum_.