[Sidenote: Tegumenti capitis differentia.] Fatentur autem se credere in Deum, qui cuncta creauit: recipiuntque pentateucum scripturae, cum Psalterio Dauidis, acerrime contendentes, se solos dilectissimos Dei filios qui etiam pro nobili differentia inuoluunt capita linteo rubeo, Saraceni autem albo, Indi croceo, et Christiani ibi manentes Indico, hoc est, aereo, seu hiacynthino. Porro a Nazareth quatuor leucis, est ciuitas olim dicta Naym, in 2. milario Thahor montis contra Meridiem iuxta Endor. Ieronimus. Ante cuius portam resuscitauit Christus defunctum filium vnicum matris suae, praesentibus duabus turmis hominum copiosorum. Hinc quoque ad leucas duas, est ciuitas Israel, vbi olim morabatur pessima regina Iezabel, quam Dei iudicio equorum vngulis conculcatam, canes fere vsque ad caluariam comederunt. CAPVT. 20. De territorio Gallileae, et Samariae, et de villa Sardenay. Item a Nazareth ad leucae dimidum, monstrantur in rupe vestigia pedum, quae dicuntur esse Domini nostri Iesu Christi vbi de manibus Iudaeorum, ipsum de alta rupe praecipitare volentium desiluit in istam. De quo saltu quidam intelligunt illud scriptum Euangelicum, Iesus autem transiens per medium illorum ibat. Ad quatuor autem leucas de Nazareth, est Cana Galileae, vbi Christus ad vrbanas matris preces, mutauit vndam in vinum optimum. [Sidenote: Mons Thabor.] Ad distantiam quatuor leucarum a Nazareth, venitur in Thabor, montem spectabilem, vbi transfigurabatur Christus, coram quibusdam suis Apostolis, apparentibus ibidem, Mose, et Helia, prophetis, voceque dilapsa a magnifica Patris gloria, et videbatur Petro bonum ibi esse: quondam in hoc monte habebatur ciuitas, cum pluribus Ecclesijs; quarum nunc sola restant vestigia, excepto quod ille locus transfigurationis est inhabitatus, qui est Schola Dei nominatus. [Sidenote: Obserueretur.] Notandum. Thabor est in medio Galileae, campus mira iucunditate sublimis, distans a Diotesaria 3. milliaribus contra Orientem. Item de Nazareth in tres leucas est villa, seu castrum Zaffara, de quo recolo me supradixisse capite 4. Et inde venitur in Mare Galileae, quod quamuis dicatur mare, est lacus aquae dulcis longus. [Sidenote: Mare Tyberiadis.] Vltra centum 60. forsitan stadia est lacus, bonorum piscium ferax et vber, qui etiam in alio loco sui vocatur mare Tyberiadis, et in alia mare Genezareth, varians sibi nomen, secundum ciuitas, et terras, propinquas. Circa hoc mare Christus frequenter, et libenter ambulasse videtur: hic vocauit ad sui discipulatum, Petrum, et Andream, Iacobum, et Ioannem: hic super vndam siccis ambulabat vestigijs, et praecipitem Petrum filium tentantem, verbo increpationis releuat ne mergatur, hic denique rediuiuus a morte repleuit discipulorum rete magnis piscibus 153.