In huius foresti capite sub monte Polembo, est ciuitas dicta Bolemba, et sub eodem monte fons qui dicitur Iuuentutis. Aqua huius fontis reddit odorem et saporem quasi de omni genere aromatum, nam singulis pene horis immutat odorem, et saporem. Et quisquis per aliquos dies potat ieiuno stomacho sanatur in breui tempore, a quacunque interiori infirmitate, languore duntaxat mortis excepto: et sane illorum qui prope sunt, et frequenter bibunt apparet per totum vitae tempus mira iuuentus. Ego autem ter vel quater bibi, quamobrem et vsque hodie arbitror potius me corporaliter valere. Putatur enim fons ille immediate per poros subterraneos eliquari de fonte paradisi terrestris, ita quod nulla via decurrentium super terram fluentium vitietur. In ista etiam regione, et in insulis circumquaque crescit gingiber valde bonum, vnde et mercatores saepe ibi tendunt de Venetia pro emendo pipere et gingibere. Gentes vero huius insulae peruersae et stollidissimae sunt superstitionis adorantes bouem tanquam animal beatissimum, propter eius simplicitatem mansuetudinem, patientiam, et vtilitatem. Multitudo cuiuslibet ciuitatis vel uillae vnum specialem nutrit bouem, quem postquam laborauit in aratro per sex annos immolant manducantes pariter cum maxima solemnitate. Et quicunque inde minimam minutiam comedit, reputat se sanctificatum totum. Porro apud Regem tenetur bos singularis, cuius custos diligentissime vrinam in uase aureo accipit simpliciter, et de fimo in vase consimili: et quotidie venit summus eorum praelatus quem dicunt Archiprotoplaustum, offert personaliter in praedictis preciosis vasis, Domino Regi de bouis vrina et fimo, atque in vrina, quam appellant Gaul, tingens manus, defricit, et perungit Regis pectus et frontem, deinde similiter de fimo in multa cordis attentione, ad finem vt possint assequi quatuor virtutes bouis praefati. Post regem cum reuerentia accedunt, et vnguntur Barones, principes, et post ipsos caeteri ordinati quicunque attingere possint, putantes se sanctificari per rem penitus non valentem, imo nimis foetidam, et inhostem. Praeterea populi isti colunt Idola facta ad medium in forma humana, et ad medium in forma bouis. In quibus permissione Dei per eorum perfidiam maligni spiritus habitant dantes de interrogatis responsa. Et hijs Idolis offerunt infinita donari aquandoque, et sacrificant interdum proprios infantes, ipsorum sanguine Idola respergentes. Dum hic maritus moritur, vxor comburitur cum marito, nisi de illo habeat sobolem cum quo viuere solet, et vilet. Quae sibi eligit cum prole superuiuere, non habebitur de caetero fide digna. Attamen in simili causa, si vir non vult cremari cum vxore mortua, non minuit ei honorem. Et forte vinum nascitur ibi: quod mulieres bibunt, et non viri, vt sic mulieribus crescant barbae, sed mulieribus raduntur, et viris minime. CAPVT. 28. De Ecclesia et corpore Saneti Thomae Apostoli.