Certo tempore anni percutitur stipes arboris vndique prope terram cum securi, et cortex in locis pluribus vulneratur, de quibus recipitur liquor spissus, qui desiccatus ad solis aestum et contritus reddit farinam albam, ac si de frumento esset confectus, attamen hic panis non est triticei saporis, sed alterius valde boni. Simili modo de suis arboribus mel elicitur, et vinum liquitur: excepto quod illa non sicut gramina prima desiccantur. Fertur quoque ibidem, extractionem huius farinae, mellis, et vini, per Angelum primitus fuisse ostensam praedicto Danorum Duci, illic fame cum suo exercitu laboranti. Contra venenum quod de quarto arboris genere stillat, solum est intoxicato remedium, vt de proprio fimo per puram aquam distemperato bibat. Et est in hac Insula quoddam mare mortuum, velut lacus foetidus, cuius in plerisque locis fundus, humano ingenio non valet attingi: mirae magnitudinis arundines crescunt super hunc lacum, in altitudine cedrorum aut abietum pedum ducentorum, ita vt viginti socij mecum nequiuimus vnius caput iacentis arundinis subleuare de terra. Minores etiam arundines nascuntur ad fluuii ripam, habentes in terra radices longitudinis trecentorum cubitorum aut plurium, Ad quarum nodos radicum, inueniuntur gemmae preciosae, de quibus expertum est, siquis vnam habuerit in pugno suo, ferrum corpori suo non nocebit: vnde si quis ibi pugnans, petat aduersarium, ac inimicum hac gemma munitum aggreditur eum cum fustibus non ferratis. De hac intratur in Insulam Calanoch, [Marginal note: Vel Alcnak.] magnam et refertam bonorum omnium. Rex eius potens est multum, et licitum est ei, quandocunque, et quibuslibet in regno vti mulieribus, de quibus interdum magnum numerum tenet puerorum. Mille quadringentos habere solet ad praeliandum elephantes, quos sibi nutriunt villani per regnum. Elephantes vocant verkes. In littore maris miraculose veniunt ibi semel in anno, per tres continuos dies, quasi de omni genere piscium marinorum, in maxima abundantia: et praebent se omnibus libere capiendos ad manum. Nam et ego ipse cepi quamplures. Vnde notandum, quod eodem tempore anni quo super dicta extrahitur farina, mel, et vinum, conueniunt in hoc isti pisces: qua ambo mirabilia fecit vno tempore Deus olim producere suo Ogero, quae et in memoria illius, vsque nunc, singulis annis innouantur. Et sunt in hoc territorio testudines terribilis quantitatis, fitque de maioribus Regi ac nobilibus delicatus ac preciosus cibus: mentior, si non quasdam ibidem viderim testudinum conchas, in quarum vna se tres homines occultarent, suntque omnes multum albi coloris. Si hic vir vxoratus moritur, sepelitur et vxor vna cum eo, quatenus, sicut ibi credunt, habeant eam statim sociam in seculo altero. The English version.