Dura autem est visum Curiae gubernatoribus satis de praedictis auditum, faciunt proclamatores silentium imperari, et incipit fieri offerenda Imperatori hoc modo. Intrant omnes qui sunt de cognatione Imperatoris Barones adornati nobilissime pro cuiusque decentia balteis, et indumentis, quorum primus cum resonante symphonia praemittit ad oblationem quotquot valet de dextrarijs albis, et inclinans ante thronum pertransit, atque per eundem modum singuli Baronum offerentes aliquid dignum iocale inclinant transeuntes, silentio firme seruato. Post hos intrantes simili modo praelati et Abbates, de iurisdictionibus et religionibus Paganorum offerunt singuli pro suo statu se reuerenter inclinantes maiestati, et maior praelatorum benedicit Regi, et suis ac Curiae quadam suae legis oratione. Deinde introducuntur elephantes, leones, pardi, simiae, marmotae, et diuersae bestiae, quarum ductores singuli transeuntes inclinant reuerenter, et intente. Postremo afferuntur aquilae, struthiones, gryphandi, accipitres, et papingi, cum diuersis auibus et auiculis, nec non serpentes ac pisces, quorum portitores inclinant profunde, quoniam dicunt omnes terrenas creaturas debere adorationem Imperatori Grand Can filio Dei excelsi: et his perfectis, Musicae Camenae persoluunt debita plene. Nos igitur intendamus hoc loco quaeso quomodo veraciter Pagani in tenebris ambulant: diabolica inuolutione mens eorum obtenebrata non videt quomodo, cum Imperator sit homo mortalis nuper natus, et similiter sicut illi infirmitate circundatus, atque in breui cum ipsis moriturus, quem etiam non dubitant sub Deo, clamant eum non Deum, sed Dei filium, vbi vtique prorsus ignorant illum non esse laudandum, nec adorandum, sed eum non intendunt alium filium, filium increatum et connaturalem, qui et ipsos et eum creauit, solum superlaudabilem in secula. Et hoc alto corde considerantes, laudemus, adoremus, glorificemus, et superexaltemus totis viribus Deum, qui nos filios lucis esse voluit, et salutis, nasci, baptizari, educari, erudiri sub sinceritate fidei Christianae, excluso schismate et errore, atque sub instituto sacrosanctae matris Ecclesiae, in qua sola pene ab omni circumferentia orbis terrae fides, quae saluat, et per dilectionem operatur nunc remansit. Et oremus instanter pro ipsis Paganis, vt agnita veritatis luce videre possint quo ambulant, vt perueniant ad Iesum Christuro coaequalem Dei filium, atque in ipso, et per ipsum laudare et adorare solum vnum verum Deum. CAPVT. 36. De ludis et praestigijs in suo festo, et de suo comitatu.