_Susanne_, femme de _Jean Le Messurier_, depose que son mary et _Collas Becquet_ plaiderent a jour passe ensemble; qu'allors ils avoyent ung enfant ayant de viron six semaines, et comme elle le despouilloit au soir, pour le coucher, il tomba sur l'estomac du djt enfant une beste noire laquelle fondit si tost que fut tombee, d'aultant qu'elle fist debvoir de la rechercher et ne peut jamais apercevoir qu'elle devint; incontinent l'enfant fut prins de mal et ne voulu teter, mais fut fort tormente; que s'estant avisee de regarder dans l'oreiller du djt enfant y trouverent des sorcerots cousus de fil, et les ayant tires et bien espluche la plume de l'oreiller, y regarda sept jours appres et y entrouva derechef avec une febve noire percee; dequoy, ayant le djt _Becquet_ ouy qu'il en estoit suspecte, sa femme vint ches la deposante comme le djt _Becquet_ estoit a la mer, et luy djt qu'a raison du bruit que la deposante avoit sucite sur son mary, iceluy _Becquet_ fuetteroit le djt _Mesurier_, son mary, et elle, et les tueroit; qu'apres cela la deposante fut ches eux leur dire que ne les craignoit, ny luy ny elle, de ce qu'ils la menacoyent de tuer son mary et elle; qu'ayant la deposante un jour six grands poulets qui couroyent appres leur mere, ils sortirent de leur maison et revinent au soir; et un a un se mirent a saulter en hault contre la cheminee et manget la scie, qu'ils moururent tous un a un, a voy ...[B] comme ils sautoyent, jusques au dernier qui dura en vie jusqu'a une heure devant le jour qu'il mourut; que depuis que l'eurent declare a _Mr Deljsle_ et les eut menaces, il a amende a son enfant et se porte bien. [Footnote B: Illegible in the record.] _Collas Rougier_ depose que son frere _Piere Rougier_ en mourant chargeoit _Collas Becquet_ de sa mort. _Collas Hugues_ raport qu'estant en une nopsce y survint _Collas Becquet_ jouet avec sa belle-fille, laquelle le rebouta; et des le mesme soir elle fut frapee de telle facon qu'on pensoit qu'elle mourust a chacune heure; qu'elle est demeuree mechaignee de coste, et trouva un des sorcerots en son lict, qui pour lors furent monstres a Messrs de Justice qui estoyent a tenir des veues a St. Pierre; que la djte fille tomboit quelque fois y terre toute aveuglee. La femme du djt _Hugues_ depose tout de mesme que son mary.