_Jean De Garis_, fils _Guillaume_, depose qu'il y a viron deux ou trois ans qu'ayant preste quelque argent sur un gage a _Collas Becquet_, luy demandant son argent, ou qu'il feroit ventiller son gage; luy repartit le djt _Becquet_ a feray donc ventiller autre chose; qu'estant le djt _de Garis_ arive en sa maison, trouva la fille malade et affligee; qu'ils trouverent des sorcerots et aultres brouilleries par plusieurs fois a l'oreiller de leur enfant; mais que la mere du djt _Becquet_ estant venue en la maison du djt _de Garis_, luy donna a boire de l'eau et la moitie d'un pain comme avoit este conseille de faire; depuis ne trouverent plus rien a l'oreiller du djt enfant; toutesfois pour eviter les djts sorcerots, ont toujours depuis couche leur enfant sur la paille; croit que ce mal leur ariva par leur moyen. _Mr Thomas de Ljsle_ depose que _Thomas Brouart_, qui demeure en sa maison, ayant appelle le fils de _Collas Becquet_, sorcier, il arriva qu'il fut un jour trouve au lict du djt _Thomas_ grand nombre de vers, et les ayant le djt _Sieur de Ljsle_ veus, les jugea comme une formioniere, tant estoyent mouvans et espais, et a peine en peuvent vuider le dit enfant, l'ayant mis en plusieurs endroits; qu'appres fut le djt enfant accueillis de poulx de telle maniere que quoyque luy changeassent des chemises et habits tous les jours ne l'en pouvoyent franchir; et qu'ayant le djt _Thomas Brouart_ un corset tout neuf, fut tellement couvert de poulx qu'on n'auroit peu cognoistre le drap, et fut contraint le faire jetter parmy les choux; surquoy fait menacer aultre _Massi_ de la batre si elle ne s'abstenoit d'ainsy traiter son enfant; qu'estant revenu trouva le djt corset parmis les choux denue de poulx, lesquels du depuis ont quitte le djt _Brouart_. _Jacques le Mesurier_ depose qu'il y a viron deux ou trois ans qu'il rencontra _Collas Becquet_ et _Perot Massi_, quj avoyent du poisson, et d'aultant qu'ils lui debvoyent de l'argent, il voulut prendre de leur poisson a rabatre, mais ne luy en voulant bailler, eurent quelque dispute; sur quoy l'un des djts _Becquet_ ou _Massi_ le menacerent qu'il s'en repentiroit; qu'au bout de deux ou trois jours il fut saisi d'un mal que le brusloit, et quelques fois devenoit tout morfondu, sans qu'on le peust eschauffer, et sans aulcune relache; qu'il fut en ces tourments pres d'un mois. _Collas Becquet_ entendit que le deposant le chargeoit d'estre causte de son mal, et menacoit qu'il tueroit le djt deposant; mais bientost appres fut le djt deposant guery; dit de cuider et de croire les djts _Becquet_ et _Massy_, ou un d'iceux, fut cause de son mal. DEPOSITIONS AGAINST COLLAS BECQUET. _MAY 17, 1617._