Quæ magna cœli mœnia, et tractus maris Terræque fines, siquid aut ultra est, capit, Mens ipsa tandem capitur: omnia hactenus Quæ nosse potuit, nota jam primum est sibi. Accede, Lector, disce quis demum sies; Et inquilinam jecoris agnoscas tui, Qua propius hæret nil tibi, et nil tam procul. Non hic scholarum frivola, aut cassi logi, Quales per annos forte plus septem legit; Ut folle pleno prodeat, rixæ artifex; Vanasque merces futili lingua crepet: Sed sancta rerum pondera, et sensus graves, Quales parari decuit, ipsa cum fuit Pingenda ratio, et vindici suo adstitit. Panduntur omnes machinæ gyri tuæ, Animæque vectes, trochleæ, cunei, rotæ; Qua concitetur arte, quo sufflamine Sistatur illa rursus, et constet sibi: Nec, si fenestram pectori humano suam Aptasset ipse Momus, inspiceret magis. Hic cerno levia affectuum vestigia, Gracilesque sensus lineas; video quibus Vehantur alis blanduli cupidines, Quibusque stimulis urgeant iræ graves. Hic et dolores, et voluptates suos Produnt recessus; ipse nec timor latet. Has norit artes, quisquis in foro velit Animorum habenas flectere, et populos cupit Aptis ligatos nexibus jungi sibi. Hic Archimedes publicus figat pedem, Siquando regna machinis politicis Urgere satagit, et feras gentes ciet, Imisque motum sedibus mundum quatit: Facile domabit cuncta, qui menti imperat. Consultor audax, et Promethei potens Facinoris anime! quis tibi dedit Deus Hæc intueri sæculis longe abdita, Oculosque luce tinxit ambrosia tuos? Tu mentis omnis, at tuæ nulla est capax. Hac laude solus fruere: divinum est opus Animam creare; proximum huic, ostendere. RAD. BATHURST, A.M. COL. TRIN. OXON. ------------------------------------------------------------------------ HUMAN NATURE: OR THE FUNDAMENTAL ELEMENTS OF POLICY. ------- CHAPTER I. [Sidenote: Introduction.]