“An ignoras, O Asclepi, quod Ægyptus imago sit cœli, aut, quod est verius, translatio et descensio omnium quæ gubernantur atque exercentur in cœlo? Et, si dicendum est, verius terra nostra totius mundi est templum: et tamen quoniam præscire cuncta prudentes decet, istud vos ignorare fas non est, futurum tempus est, quum appareat Ægyptios incassum pia mente divinitatem et sedula religione servasse, et omnis eorum sancta veneratio in irritum casura frustrabitur. E terris enim ad cœlum est recursura divinitas. _Linquatur Ægyptus, terraque, quæ fuit divinitatis sedes, religione viduata, Numinum præsentia destituetur. Alienigenis enim regionem istam terramque complentibus, non solum neglectus religionum, sed (quod est durius) quasi de legibus, a religione, pietate, cultuque divino statuetur præscripta pœna, prohibitio. Tunc terra ista sanctissima, sedes delubrorum et templorum, sepulchrorum erit mortuorumque plenissima. O Ægypte, Ægypte, religionum solæ supererunt fabulæ, eæque incredibiles posteris suis; solaque supererunt verba lapidibus incisa, tua pia facta narrantibus; et inhabitabit Ægyptum Scythos aut Indus aut aliquis talis._ Divinitas enim repetet cœlum, deserti homines toti morientur, atque ita Ægyptus Deo et homine viduata deseretur. Te verò appello sanctissimum flumen, tibique futura prædico: torrenti sanguine plenus ad ripas usque erumpes, undæque divinæ non solum polluentur sanguine, sed totæ rumpentur, et vivis multo major erit numerus sepultorum; superstes verò qui erit, lingua sola cognoscetur Ægyptius, actibus verò videbitur alienus. Quid fles, O Asclepi? Et his amplius, multoque deterius ipsa Ægyptus suadebitur, imbueturque pejoribus malis, quæ sancta quondam et divinitatis amantissima deorum in terras religionis suæ merito, sola seductio [_lege_ reductio] sanctitatis et pietatis magistra, erit maximæ crudelitatis exemplum. _Et tunc tædio hominum non admirandus videbitur mundus, neque adorandus. Hoc totum bonum, quo melius nec est, nec fuit, nec erit, quod videri possit, periclitabitur. Eritque grave hominibus, ac per hoc contemnetur, nec diligetur totus hic mundus, Dei opus immutabile, gloriosa constructio, bonum multiformi imaginum varietate compositum, machina voluntatis Dei in suo opere sine invidia suffragantis omnium in unum, quæ venerari, laudari, amari denique à videntibus possunt, multiformis adunata congestio._ Nam et tenebræ præponentur lumini, et mors vita utiloir judicabitur. Nemo suspiciet cœlum. _Religiosus pro insano, irreligiosus putabitur prudens, furiosus fortis, pro bono habebitur pessimus._ Anima enim et omnia circum eam quibus aut immortalis nata est, aut immortalitatem se consecuturam esse præsumit, secundum quod vobis exposui, non solum risus, sed etiam putabitur vanitas. _Sed mihi credite etiam periculum capitate constituetur in eum, qui se mentis religioni dederit. Nova constituentur jura, lex nova; nihil sanctum, nihil religiosum, nec cœlo, nec cœlestibus dignum audietur, aut mente credetur.