Praeterea, de coelestibus sacramentis, eidem regi ostensis, silendum esse non puto. In turri enim Londoniarum detentus, interrogatus erat a quodam sibi capellano erga festum Paschae, quomodo anima ejus concordaret in hoc sacratissimo tempore cum instantibus suis tribulationibus inevitabiliter emergentibus? Et respondit rex dicens, _Regnum coelorum, cui me semper ab infantia mea devovi, appellans exposco. De regno isto transitorio & terrestri non magna nobis cura est. Cognatus noster de Marchia se interponit, ut sibi placet. Hoc ipsum tantummodo requiro, quatinus sacramenta Paschalia & ecclesiastica cum aliis Christicolis in die coenae recipiam, ut moris nostri est,_ unde & propter nimiam suam devotionem, quam ad Deum, et ad ejus sacramenta, semper habuerat, non incongrue videtur, quod coelestibus sacramentis fuisset saepius illustratus, & in suis tribulationibus consolatus. Fertur enim a nonnullis secretioribus sibi personis, quibus solebat secreta sua reserare, quod frequenter viderat Dominum Iesum in manibus celebrantis tractatum in forma humana ei apparere sub sacramento. Dixerat iterum apud Waltha[=m] olim existens cuidam in secretis, aliis tamen a retro hoc audientibus, de multiplici revelatione Dominica sibi facta per tres annos continuos in festo sancti Edwardi, quod in vigilia Epiphaniae accidit de gloria Domini, in effigie humana apparentis, de ejus corona, & de assumptione beatae Mariae in corpore & anima ostentione. Item de absentia sacramenti a pixide, dum per quoddam equitaret cimiterium, propter quod desiit a veneratione solita sacramenti, ut supra habetur. In ipso etiam arcto guerrarum discrimine in boriae partibus, deficiente ad tempus pane commilitonibus vel turbis suis, dicitur ab inde venientibus, quod de exigua [B III _b_] tritici annona meritis ejus et precibus a[40] Deo multiplicati fuerant panes, ut querentibus[41] et petentibus sufficientia cum superfluo respondebat suis, ceteris vero suis hostibus penuriam panum patientibus.