Pudicus enim & purus fuerat rex iste H. ab ineunte aetate sua. Omnem vero lasciviam verbo & opere dum juvenis erat declinaverat, quoadusque duxerat, nubilibus venientibus annis, praenobilem dominam, dominam Margaretam, regis Ceciliae[9] filiam, ex qua unicum tantummodo procreavit filium, Edwardum s. praenobilem & virtuosum principem, cum qua & cui conjugale foedus syncerissime omnino servaverat, etiam in ipsius dominae absentia, quae aliquando perlonga fuerat: nullam aliam a sua feminam tota sua [A IV _a_] vita impudice tangens. Non etiam ad praefatam suam conjugem effrenate, vel more impudicorum, habere solebat accessum dum insimul commanserunt: sed tantummodo ut ratio et rei necessitas, servata semper inter eos honestate conjugali et cum magna gravitate. _Exemplum._ In argumentum vero suae servatae pudicitiae, omnino consueverat effugere nuditatem et virorum et mulierum incantius[10] aspicere. ne, ut David, amore illicito caperetur, cujus animam, prout legimus, oculi depraedati fuerant. Propterea princeps iste pepigerat cum oculis suis foedus, ut nec saltem impudice quamlibet aspicerat[11] feminam. _Aliud exemplum._ Unde semel contigit, quod tempore natalis Domini choreas, vel spectaculum quoddam generosarum juvencularum, resolutis sinibus suis nudatas mamillas proponentium, quidam adduceret magnus dominus coram eo, ut ante regis aspectum juvenes illae mulierculae sic denudatae tripudiarent, ad probandum forsan eum, vel ad alliciendum regis juvenilem animum. Sed rex iste non improvidus, nec diabolicae fraudis ignarus, his spretis praestigiis, nimium indignatus, oculos avertens, dorsum ejus citius posuit, et ad cameram suam exivit dicens, =Fy fy, for shame, forsothe ye be to blame.=