In weiris quhen thay yokit the aduersar, thay invadet athir with ane arrow or a lance. Thay vsed ane twa edged sword lykwyse; the futmen a lang sword, the horsmen a schort sword bot baith vset a verie braid sword, with a scheiring sharpe edge that at the first straik, with little force, it walde scheir a man in twa in the waste or midle. Thay war harnest with Jacks al wouen throuch with yrne huikes, quhilkes habbirgeounis thay cal: This vpon, or as we say, abone a lathir cote, quhilke was na les stark than it was elegant, thay put on. Al thair harnesse was lycht, that gif thay fel in ony danger, the lychtlier thay mycht slip out of the handes of thair ennimies: for in swiftnes of fute, in quhilke thay walde ouirrin the swoftest horse, quhither the way war lang and plane, or gif it war cumirsum throuch hilis or hopes, in sik swoftnes, I say, thay obteined gret prais, athir quhen the ennimie flies to follow, or quhen the ennimie persues to flie, and gif mister be to declyne from perrel.... Thair cleithing was til necessitie, and nocht till decore, maist conuenient ay to the weiris; for thay al vset mantilis of ane forme, baith the Nobilitie and the commone people, excepte that the Nobilitie delyted mair in coloured claith and sindrie hewis, and thir mantilis war baith wyd and lang, notwithstandeng about the bosum, quhair thay walde decentlie losin. I can weil think thir same to be the kynd of cleithing quhilke in ald times in latin war called Brachæ. In thir only mantilis in the nyt seasone, thay rowit thame selfes, and in thame sleipit sound: this was thair maner, and this day the hilande men, and thay of Irland weiris even siklyke, bot now thay use ruch couirings, ane sorte to thair bed, another sorte to the Jornay conuenient. The rest of thair claithis, was a schorte cote of woll, with wyde and apne sleiues that the radier quhen thay walde thay myt schote or caste a darte, or ane arrow, breickis thay had verie slichte, and indeid mair to hyd thair memberis than for ony pompe or pryd, or to defend thame frome the calde was meit. Of linnine lykwyse thay maid wyd sarkis, with mony bosumis, and wide sleifes of negligence hinging doune evin to thair knies. Thir sarkis the mair potent amang thame vset to smeir with saffronne, bot vthiris with a certane fatnes, and this thay did to keip thame cleine frome al filthines. Nathing thay thocht worthier of counsel than to exercise thame selfes continuallie in the sueit of the Barresse, or in siklyke ane exercise. In makeng thame, appeirit na kair or trauel neglected athir in arte or decore: as with threid of silke, cheiflie greine, or rid, al the partes of the sarke maist artificiouslie thay sewit.