Þa ongeat se deofol þæt Adam and Eua wæron to ðy gesceapene þæt hi sceolon mid eadmodnysse and mid gehyrsumnysse geearnian ða wununge on heofenan rice ðe hé of-afeoll for his up-ahefednysse, þa nam hé micelne graman and ándan to þam mannum, and smeade hú hé hí fordón mihte. He com ða on næddran hiwe to þam twam mannum, ærest to ðam wife, and hire to cwæð, "Hwí forbead God eow þæs treowes wæstm, ðe stent on middan neorxna-wange?" Þa cwæð þæt wíf, "God us forbead þæs treowes wæstm, and cwæð þæt we {18} sceoldon deaðe sweltan, gif we his on byrigdon." Ða cwæð se deofol, "Nis hit na swa ðu segst, ac God wát genoh geare, gif ge of ðam treowe geetað, þonne beoð eowere eagan geopenode, and ge magon geseon and tocnáwan ægðer ge gód ge yfel, and ge beoð englum gelice." Næron hí blinde gesceapene, ac God hí gesceop swa bilewite þæt hí ne cuðon nan ðing yfeles, naðor ne on gesihðe, ne on spræce, ne on weorce. Wearð þeah þæt wíf ða forspanen þurh ðæs deofles láre, and genam of ðæs treowes wæstme, and geæt, and sealde hire were, and hé geæt. Ða wæron hí butu deadlice, and cuðon ægðer ge gód ge yfel; and hí wæron ða nacode, and him ðæs sceamode. Þa com God and axode hwi he his bebod tobræce? and adræfde hí butu of neorxna-wange, and cwæð, "Forðan ðe ðu wære gehyrsum ðines wifes wordum, and min bebod forsawe, þu scealt mid earfoðnyssum þe metes tilian, and seo eorðe þe is awyriged on þinum weorce, sylð þe ðornas and bremblas. Þu eart of eorðan genumen, and þu awenst to eorðan. Þu eart dust, and ðu awentst to duste." God him worhte ða reaf of fellum, and hí wæron mid þam fellum gescrydde. Ða deadan fell getacnodon þæt hí wæron ða deadlice þe mihton beon undeadlice, gif hi heoldon þæt eaðelice Godes bebod. Ne þorfte Adam ne eal mancynn þe him siððan ofacom næfre deaðes onbyrian, gif þæt treow moste standan ungehrepod, and his nan man ne onbyrigde; ac sceolde Adam and his ofspring tyman on asettum tyman, swa swa nu doð clæne nytenu, and siððan ealle buton deaðe faran to ðan ecan life. Næs him gesceapen fram Gode, ne hé næs genedd þæt hé sceolde Godes bebod tobrecan; ac God hine lét frigne, and sealde him agenne cyre, swa hé wære gehyrsum, swa hé wære ungehyrsum. Hé wearð þa deofle gehyrsum, and Gode ungehyrsum, and wearð betæht, hé and eal mancynn, æfter ðisum lífe, into helle-wíte, mid þam deofle ðe hine forlærde. Þa wiste God hwæðere þæt hé wæs forlæred, and smeade hu he mihte his and ealles mancynnes eft gemiltsian.