Lucas se Godspellere awrát on Cristes béc, þæt on ðam {30} timan se Romanisca casere Octauianus sette gebánn, þæt wære on gewritum asett eall ymbhwyrft. Þeos towritennys wearð aræred fram ðam ealdormen Cyrino, of Sirian lande, þæt ælc man ofer-heafod sceolde cennan his gebyrde, and his áre on ðære byrig þe hé to gehyrde. Þa ferde Ioseph, Cristes foster-fæder, fram Galileiscum earde, of ðære byrig Nazareð, to Iudeiscre byrig, seo wæs Dauides, and wæs geciged Bethleém, forðan ðe hé wæs of Dauides mægðe, and wolde andettan mid Marían hire gebyrde, þe wæs þa gýt bearn-eaca. Ða gelámp hit, þaða hí on þære byrig Bethleém wícodon, þæt hire tima wæs gefylled þæt heo cennan sceolde, and acende ða hyre frumcennedan sunu, and mid cild-claðum bewánd, and aléde þæt cild on heora assena binne, forþan þe ðær næs nán rymet on þam gesthuse. Þa wæron hyrdas on þam earde waciende ofer heora eowede; and efne ða Godes engel stód on emn hí, and Godes beorhtnys hí bescean, and hí wurdon micclum afyrhte. Ða cwæð se Godes engel to ðam hyrdum, "Ne ondredað eow; efne ic eow bodige micelne gefean, þe becymð eallum folce; forðan þe nu to-dæg is eow acenned Hælend Crist on Dauides ceastre. Ge geseoð þis tácen, ge gemétað þæt cild mid cild-claðum bewunden, and on binne geléd." Þa færlice, æfter þæs engles spræce, wearð gesewen micel menigu heofenlices werodes God herigendra and singendra, "Gloria in excelsis Deo, et in terra pax hominibus bone uoluntatis," þæt is on urum gereorde, "Sy wuldor Gode on heannyssum, and on eorðan sibb mannum, þam ðe beoð godes willan." And ða englas ða gewiton of heora gesihðe to heofonum. Hwæt ða hyrdas þa him betweonan spræcon, "Uton faran to Bethleem, and geseon þæt word þe us God æteowde." Hí comon ða hrædlice, and gemetton Marían, and Ioseph, and þæt cild geled on anre binne, swa swa him se engel cydde. Þa hyrdas soðlice oncneowon be þam worde þe him gesæd wæs be ðam cilde, and ealle wundrodon þe þæt gehyrdon, and eac be ðam ðe þa hyrdas him sǽdon. María soðlice heold ealle þas wórd arǽfniende {32} on hire heortan. Ða gecyrdon þa hyrdas ongean wuldrigende and herigende God on eallum ðam ðingum þe hí gehyrdon and gesawon, swa swa him fram þam engle gesǽd wæs.