Mine gebroðra þa leofostan, ure Hælend, Godes Sunu, euen-ece and gelic his Fæder, seðe mid him wæs æfre buton anginne, gemedemode hine sylfne þæt he wolde on ðisum dægðerlicum dæge, for middangeardes alysednysse beon lichamlice acenned of þam mædene Marían. He is Ealdor and Scyppend ealra gódnyssa and sibbe, and he foresende his acennednysse ungewunelice sibbe, forðan ðe næfre næs swilc sibb ær þam fyrste on middangearde, swilc swa wæs on his gebyrde-tide, swa þæt eall middangeard wæs anes mannes rice underðeod, and eal mennisc him anum cynelic gafol ageaf. Witodlice on swa micelre sibbe wæs Crist acenned, seðe is ure sib, forþan ðe hé geþeodde englas and men to ánum hirede, þurh his menniscnysse. Hé wæs acenned on þæs caseres dagum þe wæs Octauianus geháten, se gerymde Romana rice to ðan swiðe þæt him eal middangeard to beah, and he wæs forði Augustus geciged, þæt is geýcende his rice. Se nama gedafenað þam heofonlican Cyninge Criste, þe on his timan acenned wæs, seðe his heofonlice rice geyhte, and ðone hryre, þe se feallenda deofol on engla werode gewanode, mid menniscum gecynde eft gefylde. Na þæt án þæt he ðone lyre anfealdlice gefylde, ac eac swylce micclum geihte. Soðlice swa micel getel mancynnes becymð þurh Cristes menniscnysse to engla werodum, swa micel swa on heofonum beláf haligra engla æfter ðæs deofles hryre. Þæs caseres gebann, þe het ealne middangeard awritan, getacnode swutellice þæs heofonlican Cyninges dæde, þe to ði com on middangeard þæt he of eallum ðeodum his gecorenan gegaderode, and heora naman on ecere eadignysse awrite. Þeos towritennys asprang fram ðam ealdormen Cyrino: Cyrinus is gereht Yrfenuma, and he getacnode Crist, seðe is soð yrfenuma þæs ecan Fæder; and he us forgifð þæt we mid him {34} beon yrfenuman and efenhlyttan his wuldres. Ealle ðeoda þa ferdon þæt ælc synderlice be him sylfum cennan sceolde, on ðære byrig þe he to hyrde. Swa swa on ðam timan be ðæs caseres gebanne gehwilce ænlipige on heora burgum be him sylfum cendon, swa eac nu us cyðað láreowas Cristes gebann, þæt we ús gegadrian to his halgan gelaðunge, and on ðære ures geleafan gafol mid estfullum mode him agifan, þæt ure naman beon awritene on lifes bec mid his gecorenum.