Gelóme wurdon englas mannum æteowode on ðære ealdan ǽ, ac hit nis awriten þæt hí mid leohte comon, ac se wurðmynt wæs þises dæges mærðe gehealden, þæt hí mid heofenlicum leohte hí geswutelodon, ðaða þæt soðe leoht aspráng on ðeostrum riht geþancodum, se mildheorta and se rihtwisa Drihten. Se engel cwæð to þam hyrdum, "Ne beo ge afyrhte; efne ic bodige eow micelne gefean, ðe eallum folce becymð, forðan þe nu to-dæg is acenned Hælend Crist on Dauides ceastre." Soðlice hé bodade micelne gefean, seðe næfre ne geendað; forðan þe Cristes acennednys gegladode heofenwara, and eorðwara, and helwara. Se engel cwæð, "Nu to-dæg is eow acenned Hælend Crist on Dauides ceastre:" Rihtlice hé cwæð on dæge, and ná on nihte, forðan ðe Crist is se soða dæg, seðe todræfde mid his to-cyme ealle nytennysse þære ealdan nihte, and ealne middangeard mid his gife onlihte. Þæt tácen þe se engel ðam hyrdum sæde we sceolon symle on urum gemynde healdan, and þancian ðam Hælende þæt he gemedemode hine sylfne to ðan þæt hé dælnimend wære ure deadlicnysse, mid menniscum flæsce befangen, and mid wáclicum cild-claðum bewunden. Þa fǽrlice, æfter þæs engles spræce, wearð gesewen micel menigu heofenlices werodes {38} God herigendra and singendra, "Sy wuldor Gode on heannyssum, and on eorðan sibb þam mannum þe beoð godes willan." An engel bodade þam hyrdum þæs heofonlican Cyninges acennednysse, and ða færlice wurdon æteowode fela ðusend engla, þy læs ðe wǽre geþuht anes engles ealdordom to hwonlic to swa micelre bodunge: and hí ealle samod mid gedremum sange Godes wuldor hleoðrodon, and godum mannum sibbe bodedon, swutellice æteowiende þæt þurh his acennednysse men beoð gebigede to anes geleafan sibbe, and to wuldre godcundlicere herunge. Hí sungon, "Sy wuldor Gode on heannyssum, and on eorðan sibb mannum, ðam ðe beoð godes willan." Ðas word geswuteliað þæt ðær wunað Godes sibb þær se goda willa bið. Eornostlice mancynn hæfde ungeþwærnysse to englum ær Drihtnes acennednysse; forðan ðe we wæron þurh synna ælfremede fram Gode; þa wurde we eac ælfremede fram his englum getealde: ac siððan se heofenlica Cyning urne eorðlican lichaman underfeng, siððan gecyrdon his englas to ure sibbe; and ða ðe hí ærðan untrume forsawon, þa hi wurðiað nu him to geferum. Witodlice on ðære ealdan ǽ, Loð, and Iosue, and gehwilce oðre þe englas gesawon, hí luton wið heora, and to him gebædon, and ða englas þæt geðafodon: ac Iohannes se Godspellere, on ðære Niwan Gecyðnysse, wolde hine gebiddan to þam engle þe him to spræc, þa forwyrnde se engel him ðæs, and cwæð, "Beheald þæt ðu ðas dæde ne dó; ic eom ðin efen-ðeowa, and ðinra gebroðra; gebide ðe to Gode anum." Englas geþafodon ær Drihtnes to-cyme þæt mennisce men him to feollon, and æfter his to-cyme þæs forwyrndon; forðan þe hí gesáwon þæt heora Scyppend þæt gecynd underfeng þe hí ær ðan wáclic tealdon, and ne dorston hit forseon on ús, þonne hí hit wurðiað bufon him sylfum on ðam heofonlican Cyninge. Ne hí manna geferrædene ne forhógiað,