en diuers endroits des Hurons quand sa Maiesté leur y donnera entrée. Ie ne crains qu'vne chose en ce dilayement, que l'Ancienne Frãce ne se lasse de secourir la Nouuelle voiãt que la moisson tarde tant à meurir: mais qu'ō se souuienne que les potirõs naissent en vne nuict, & qu'il faut [111 i.e., 211] des années pour meurir les fruicts de la palme. On a esté 38 ans à ce que i'ay ouy dire, auant que de rien faire au Brasil. Combien a on attendu aux portes de la Chine? Dieu vueille qu'õ y soit biē entré de l'heure que ie parle. Ceux qui courent, & qui s'eschauffent si fort se lassent bien souuent plus qu'ils n'auancent. Ie ne dy pas cecy pour reietter bien loing la conuersion des Sauuages. Si nos Peres fussent entrés cette année aux Hurõs ie m'attendois de rescrire à V. R. l'an prochain que, _receperat Samaria verbum Dei_, que ces barbares auoient receu la foy; ce fera quãd il plaira à celuy duquel dépẽd ce grãd ouurage: car à mõ aduis les hõmes y peuuent bien peu, quoy qu'ils n'y doiuent espargner ny leurs trauaux, ny leur sãg, ny leur vie. ô qui verroit dans l'vne des grandes ruës de Paris ce que ie voyois il y a trois iours aupres du grand fleuue S. [212] Laurẽs, cinq ou six cens Hurõs vestus à la Sauuage, les vns de peaux d'ours, les autres de peaux de castor, & d'autres de peau d'Eslan, tous hõmes bien faits, d'vne riche taille, hauts, puissans, d'vne bõne paste, d'vn corps biẽfourny; qui les verroit dy ie demãdans secours, & proferans les parolles que disoit ce Macedonien à sainct Paul, _Transiens in Macedoniam adiuua nos_: Venés, secourés nous, apportés en nostre païs le flambeau qui n'y a iamais esclairé! ô que ce spectacle donneroit de cõpassion à ceux qui ont tant soit peu d'amour de celuy qui a verse tout sõ sang pour ces ames qui se perdent tous les iours faute que personne ne le recueille pour leur appliquer.