comeſt thou / thou haſt ſlayne ſoume man / And he ſayd I have not / the cryſten man ſayd Veryly thou has commyſed ſomme homycyde / for thou art all beſprongen[37] with the blood. And the Jewe ſaid / Veryly the god of Cryſten men is grete and the faythe of hym is ferme and approved in all thynges / I have ſmyten no man / but I have ſmyten thymage of Iheſu Cryſte / and anone yſſued blood of his throte /. And thenne the Jewe brought the Cryſten man to the pytte / and then they drewe oute that hooly ymage /. And yet is ſene on this daye the wounde in the throte of thymage / And the Iewe anone bycam a good Cryſten man, & was baptyſed / In Syre in the cyte of baruth there was a criſten man / which had hyred an hous for a yere / & he had ſet thymage of the crucifixe by his bedde to whiche he made dayly his prayers and ſaid his devocions / & at the yeres ende he remeved and tooke another hous / & forgate & lefte thymage behynde hym / and it happed that a Iewe hyred that ſame hows / & on a daye he had another Iewe one of his neyghbours to dyne / & as they were at mete it happed hym that was boden[38] in lookyng on the walle to eſpye this ymage whiche was fyxed to the walle and beganne to grenne at it for deſpyte / and ageynſt hym that bad hym / & alſo thretned & menaced hym bycauſe he durſt kepe in his hous thymage of Iheſu of nazareth / & that other Iewe ſware as moche as he myght / that he had never ſene it / ne knewe not that it was there / & thenne the Iewe fayned as he had been peaſyd[39]. / & after went ſtrayt to the prynce of the Iewes / & accuſed that Iewe of that whiche he hadde ſene in his hous / thenne the Iewes aſſembleden & cam to the hous of hym / & ſawe thymage of Iheſu Cryſt / and they took that Iewe and bete hym / & did to hym many iniuryes / & caſte hym out half dede of their ſynagoge / & anone they defowled thymage with their feet / & renewed in it all the tormentes of the paſſion of oure lorde / & and when they perced his ſyde with the ſpere / blood and water yſſued haboundauntly / in ſo moche that they fylled a veſſel / whiche they ſet therunder / And thenne the Iewes were abaſſhhed & bare this blood in to theyr ſynagoge & and alle the ſeke men and malades that were enoynted therwyth / were anone guaryſſhed & made hool / & thenne the Iewes told & recounted al this thynge by ordre to the biſhop of the countre / & alle they with one wyll receyved baptyſm in the faythe of Iheſu Cryſt / & the biſſhop putt the blood in ampulles[40] of Cryſtalle & of glas for to be kepte / & thenne he called / the Cryſten man that had lefte it in the hows / & enquyred of hym / who had made ſo fayr an ymage / & he ſaid that Nychodemus had made it / And when he deyde / he lefte it to gamalyel / And Gamalyel to Zachee and Zachee to Iaques / and Iaques to Symon / and hadde ben thus in Ieruſalem unto the deſtruction of the Cyte / and fro thennes hit was borne in to the Royamme of Agryppe of Cryſten